24 جاستاعى ابلاي سۋلەيمەنوۆ ماڭعىستاۋ تۇرعىنى. 22 ماۋسىم كۇنى ساعات 11:40-تا اۋرۋحاناعا- ورتاشا جاعدايدا تۇسكەن.  ەر ادامدى اعىسپەن تەڭىزگە الىپ كەتكەن. ونى يراندىق كەمە ەكيپاجى كورىپ قالعان. قاتتى شولدەگەن گيپورتەرمياعا شالدىققان ونى ماڭعىستاۋ وبلىستىق اۋرۋحاناسىنا جەتكىزگەن. بۇل تۋرالى قامشى اقپاراتتىق اگەنتتىگى "لادا" گازەتىنە سىلتەمە جاساپ حابارلايدى.

-اۋرۋحاناعا تۇسكەندە ول جانساقتاۋ بولىمىندە جاتتى. دەنە قىزۋى  32 گرادۋسقا دەيىن ءتۇستى. ۇزاق ۋاقىت سۋ، تاماق ىشپەگەن سوڭ كەۋدە تۇسىنداعى اۋرۋعا شاعىمدانعان.  ءقازىر جاعدايى جامان ەمەس. كەلەسى اپتادا اۋرۋحانادان شىعارامىز-دەيدى  اۋرۋحانانىڭ تراۆموتولوگيا ءبولىمىنىڭ مەڭگەرۋشىسىنىڭ ورىنباسارى ەسەت شاحاتبايەۆ.

ماۋسىمنىڭ 18-نەن 19-نا قاراعان ءتۇنى ابلاي تەڭىزدە ءجۇزىپ قايتپاقشى بولادى. ابلايدى تەڭىز اعىنى الىپ كەتكەن.

قاراڭعىدا ەشتەڭە كورمەگەن ول بىرنەشە تاۋلىك بويى جۇزە بەرگەن. جاعاعا شىعۋدى ماقسات ەتىپ جۇزە بەرگەن ول ساتتىلىگىنە وراي، يراندىق كەمەگە كەزدەسكەن.

شولۋشى: نازەركە مۇسا