بۇگىن ۇكىمەت ۇيىندە ق ر پرەمەر-مينيسترى باقىتجان ساعىنتايەۆ ەۋروپالىق كوميسسيانىڭ ەكس-پرەزيدەنتى جوزە مانۋەل بارروزۋمەن قارجى جانە ينۆەستيسيالىق سالالاردى دامىتۋدىڭ وزەكتى ماسەلەلەرى بويىنشا كەزدەسۋ وتكىزدى، دەپ جازادى  قامشى  اقپاراتتىق اگەنتتىگى. بۇل تۋرالى پرەمەر-مينيستردىڭ رەسمي سايتى جاريالادى.

كەزدەسۋ بارىسىندا ەۋرازەق دامىتۋ الەۋەتى، سونىمەن قاتار الەمدىك ترەندتەردى ەسكەرە وتىرىپ، قازاقستاننىڭ قارجى جۇيەسىن ودان ءارى دامىتۋ ماسەلەلەرى تالقىلاندى. سونداي-اق، تاراپتار ج. م. بارروزۋدىڭ ەۋروپالىق كوميسسياعا ءتوراعالىق ەتكەن كەزىندە قول قويىلعان كەڭەيتىلگەن سەرىكتەستىك تۋرالى كەلىسىم اياسىندا قازاقستان مەن ەو-نىڭ الداعى ىنتىماقتاستىق كەلەشەگى تۋرالى پىكىرلەرىمەن الماستى.

ايتا كەتەرلىگى، ەۋروپالىق كوميسسيانىڭ ەكس-پرەزيدەنتى، پورتۋگاليانىڭ پرەمەر-مينيسترى (2002-2004 جج.) جوزە مانۋەل بارروزۋ قازاقستانعا 22-24 ماۋسىم ارالىعىندا استانادا وتكىزىلىپ جاتقان ەۋرازيالىق مەديا فورۋمعا قاتىسۋ ءۇشىن كەلدى.