بۇگىن ەكسپو اياسىنداعى ۇلىبريتانيا كۇنى اتاپ وتىلۋدە، دەپ جازادى قامشى اقپاراتتىق اگەنتتىگى.

Sputnik قازاقستان جاڭالىقتارىنىڭ حابارلاۋىنشا، ەليزاۆەتا ءىى پاتشايىمنىڭ ءىنىسى، الەمدەگى العاشقى ەكسپو كورمەسىنىڭ نەگىزىن قالاۋشى حانزادا البەرتتىڭ ۇرپاعى، جوعارى مارتەبەلى گلوستەر گەرسوگى، حانزادا ريچارد ەكسپو-2017 كورمەسىندەگى ۇلىبريتانيا ۇلتتىق كۇنىن سالتاناتتى تۇردە اشتى. 

"بۇگىن ورتا ازيادا العاش رەت وتكىزىلىپ وتىرعان ەكسپو كورمەسىنە قاتىسقانىما قۋانىشتىمىن. وزدەرىڭىزگە بەلگىلى، العاشقى ەكسپو ۇلىبريتانيادا 1851 جىلى وتكەن بولاتىن. ونىڭ نەگىزىن قالاۋشى مەنىڭ ارعى اتام حانزادا البەرت بولدى. كورمەگە التى ميلليون ادام قاتىسقان. ول كورمەدە فاكس-ماشينا، داۋىل بولجاعىش سياقتى ونەرتابىستار العاش رەت ۇسىنىلعان ەدى. ەكسپو ەركىن ساۋدا مۇلدەم جوق زاماندا جاڭا ەكونوميكالىق بايلانىستار قۇرۋ ماقساتىندا ۇيىمداستىرلعان بولاتىن. بۇل ءداستۇردىڭ 21 عاسىردا دا جالعاسىن تاۋىپ جاتقانى، ارينە، قۋانتارلىق جايت"، — دەدى حانزادا. 

ەكسپو كورمەسىندەگى ۇلتتىق كۇندى اتاپ ءوتۋ ءۇشىن ق ر بۇرىنعى سىرتقى ىستەر ءمينيسترى، قازاقستاننىڭ ۇلىبريتانياداعى ەلشىسى ەرلان ىدىرىسوۆ تا كەلدى. 
 

مادەني باعدارلاما اياسىندا كورمە كەشەنى اۋماعىندا لوندون زاماناۋي بالەت تەاترىنىڭ قويىلىمدارى، شوتلاند ۆولىنكالارىنىڭ كونسەرتى وتەدى. ال مانچەستەر ۋنيۆەرسيتەتىنىڭ گرافەن تۋرالى تەحنولوگيالىق شوۋى باعدارلامانىڭ كوركىن ودان سايىن اشا تۇسپەك.  

بۇدان بولەك، پاۆيلونعا كەلۋشىلەرگە ارناپ ءسان كورسەتىلىمى، "Brassroots" دجاز توبىنىڭ كونسەرتى ۇيىمداستىرىلادى، ال گارري پوتتەر تابىنۋشىلارى ول تۋرالى شىتىرمان وقيعالاردى قازاق جانە ورىس تىلدەرىندە تىڭدايتىن بولادى.