"ازاماتتارعا ارنالعان ۇكىمەت" مەملەكەتتىك كورپوراسياسى زەينەتاقىنى قايتا ەسەپتەدى دەپ حابارلايدى قامشى اقپاراتتىق اگەنتتىگى كورپوراسيانىڭ باسپا ءسوز قىزمەتىنە سىلتەمە جاساپ.  1 شىلدەدەن باستاپ 2،1 ميلليوننان استام زەينەتكەر ۇلعايتىلعان زەينەتاقى الادى. قازاقستاندىقتاردىڭ ىنتىماقتى زەينەتاقى تولەمدەرى جىل باسىندا 9 پايىزعا ارتتىرىلعانىن ەسكەرە وتىرىپ، 11 پايىزعا كوبەيەتىن بولادى. بازالىق زەينەتاقى جىل باسىندا 7 پايىزعا ارتتىرىلعانىن ەسكەرە وتىرىپ، 13 پايىزعا وسەدى. بۇل تاپسىرىستى مەملەكەت باسشىسى 2017 جىلعى قاڭتار ايىندا قازاقستان حالقىنا جولداۋىندا بەردى. 

جولداۋعا سايكەس 2017-2018 جىلدارى زەينەتاقى مولشەرى كەزەڭ-كەزەڭمەن وسەدى. 2016 جىلمەن سالىستىرعاندا 2017 جىلدىڭ 1 شىلدەسىنەن باستاپ زەينەتاقى مولشەرى 20 پايىزعا دەيىن كوتەرىلەدى. ماسەلەن، ەڭ تومەنگى زەينەتاقى مولشەرى (بازالىق زەينەتاقىنى ەسكەرە وتىرىپ) 2017 جىلدىڭ 1 قاڭتارىنان باستاپ 40 950 تەڭگە بولسا، 2017 جىلدىڭ 1 شىلدەسىنەن باستاپ 45 711 تەڭگەگە دەيىن كوتەرىلەدى. سالىستىرما تۇردە 2016 جىلى ەڭ تومەنگى زەينەتاقى مولشەرى 37789 تەڭگەنى قۇرادى. بازالىق زەينەتاقى تولەمدەرى بيىلعى جىلدىڭ 1 شىلدەسىنەن باستاپ 14 466 تەڭگەنى قۇرايدى، ال  زەينەتاقىنىڭ ورتاشا مولشەرى (بازالىق زەينەتاقىنى ەسكەرە وتىرىپ) 66 676 تەڭگەگە دەيىن ارتادى.

زەينەتاقى تولەمدەرى بارلىق ەسەپتە تۇرعان زەينەتكەرلەرگە قايتا ەسەپتەلەتىنى ايتىلادى. بۇل رەتتە، قوسىمشا قۇجاتتاردى ۇسىنۋ تالاپ ەتىلمەيدى.

سونداي-اق، انا مەن بالانى قولداۋ بويىنشا مەملەكەتتىك ساياسات شەڭبەرىندە 1 شىلدەدەن باستاپ بالا تۋۋىنا بايلانىستى ءبىرجولعى جاردەماقى مولشەرى 20 پايىزعا ۇلعايادى. ءبىرىنشى، ەكىنشى جانە ءۇشىنشى بالاعا جاردەماقى سوماسى 38 اەك نەمەسە 86 222 تەڭگەنى، ءتورتىنشى جانە ودان كەيىنگى بالالارعا - 63 اەك نەمەسە 142 947 تەڭگەنى قۇرايدى.

"سونداي-اق، جۇمىس بەرۋشىلەرگە قازاقستاندا 1 شىلدەدەن باستاپ مىندەتتى الەۋمەتتىك مەديسينالىق ساقتاندىرۋ جۇيەسى ىسكە قوسىلاتىنى تۋرالى ەسكەرتەمىز. ازاماتتارعا ارنالعان ۇكىمەت ءمامس شەڭبەرىندە اۋدارىم جانە جارنالاردى قابىلداۋعا اعىمداعى شوت اشىلعان"، - دەلىنگەن حابارلامادا. 
 

شولۋشى: اسەم المۇحانبەت