گۇلشارا ءابدىقالىقوۆا سالتاناتتى شارا بارىسىندا سىيلىق لاۋرەاتتارى مەن گرانت يەگەرلەرىن، مەملەكەت باسشىسىنىڭ العىسىنا يە بولعان شىعارماشىلىق ۇجىمداردى، سونداي-اق قازاقستاننىڭ بارلىق جۋرناليستەرىن كاسىبي مەرەكەسى – بايلانىس جانە اقپارات سالاسى قىزمەتكەرلەرىنىڭ كۇنىمەن قۇتتىقتادى.
– ءقازىر ەلىمىزدىڭ حالىقارالىق وڭ ءيميدجىن ىلگەرىلەتۋ جونىندەگى جۇمىستار قىزۋ ءجۇرىپ جاتىر. سونىڭ ىشىندە قازاقستاننىڭ يننوۆاسيالىق بولاشاعىن قالىپتاستىرۋ جانە الەمنىڭ وزىق 30 ەلىنىڭ قاتارىنا قوسىلۋ ۇدەرىستەرىن جان-جاقتى كورسەتۋ ىسىندەگى وتاندىق باق-تىڭ ءرولى ارتا تۇسۋدە. وسى ستراتەگيالىق مىندەتتەردى ءتيىمدى جۇزەگە اسىرۋ مەملەكەت پەن مەديا-قوعامداستىقتىڭ ءوزارا جەمىستى ءىس-قيمىل ورناتۋى قاجەتتىگىنە نەگىزدەلەدى، – دەدى مەملەكەتتىك حاتشى.
سونىمەن قاتار، گۇلشارا ءابدىقالىقوۆا جۇيەلى تۇردە اقپاراتتاندىرۋ جۇمىستارىن جۇرگىزۋ بيىل ەلباسى باستاماشىلىق ەتكەن قازاقستاننىڭ ءۇشىنشى جاڭعىرۋىن تابىستى ىسكە اسىرۋدىڭ نەگىزگى فاكتورىنىڭ ءبىرى بولىپ سانالاتىنىن اتاپ ءوتتى.
مەملەكەت باسشىسىنىڭ وكىمىمەن سىيلىقتار قاراعاندى وبلىستىق «ورتالىق قازاقستان» گازەتىنىڭ باس رەداكتورى ماعاۋيا سلانبەك ۇلى سەمبايەۆقا جانە «حابار» اگەنتتىگىنىڭ مەنشىكتى ءتىلشىسى مايرا قابي قىزى ابدراحمانوۆاعا تابىس ەتىلدى.
گرانتتار «ايقىن» گازەتىنىڭ ءتىلشىسى ايحان پىشەنباي ۇلى ءشارىپوۆ پەن «كازاحستانسكايا پراۆدا» گازەتىنىڭ ءتىلشىسى يۋليا دميترييەۆنا ماگەرگە تاپسىرىلدى.
قازاقستان رەسپۋبليكاسى پرەزيدەنتىنىڭ العىسى «استانا» تەلەارناسىنداعى «ءبىزدىڭ ۋاقىت» تەليەۆيزيالىق باعدارلاماسىنىڭ، «مىسل» رەسپۋبليكالىق قوعامدىق-ساياسي جۋرنالىنىڭ، باتىس قازاقستان وبلىستىق «پريۋرالە» گازەتىنىڭ جانە «حابار 24» تەلەارناسىنىڭ شىعارماشىلىق ۇجىمدارىنا جاريالاندى.
