شىمكەنتتە مۇناي ساقتاۋ قويماسىنداعى ورتتە قازا تاپقان جۇمىسشىنىڭ وتباسىنا 1 ملن. تەڭگە وتەماقى بەرىلەدى. بۇل تۋرالى «شىمكەنت مۇناي ونىمدەرى» اق-نىڭ زاڭگەرى بەرىك سەركىنبايەۆ مالىمدەدى، دەپ حابارلايدى قازاقپارات حاا.

زاڭگەردىڭ سوزىنشە وتەماقى كولەمى ۇجىمدىق  كەلىسىمشارت نەگىزىندە بەلگىلەنگەن. وعان سايكەس جۇمىسشى قىزمەت بابىندا قازا تاپقان جاعدايدا وسى سوما كولەمىندە وتەماقى بەرىلەدى. مارقۇمنىڭ وتباسى سونداي-اق ءومىرىن ساقتاندىرۋ بويىنشا دا تولەماقى الادى. ازىرگە ونىڭ سوماسى ناقتىلانباپتى. كومپانيا باسشىلىعى جۇمىسشىنى جەرلەۋ راسىمىنە كەتكەن شىعىنداردى دا ءوزى كوتەرىپ وتىر.  الداعى ۋاقىتتا قازا تاپقان 46 جاستاعى جۇمىسشىنىڭ كامەلەت جاسىنا تولعان ءبىر وتباسى مۇشەسىن جۇمىسقا قابىلداماق.

ايتا كەتەيىك، مارقۇمنىڭ ارتىندا جۇبايى مەن 4 بالاسى قالدى.

ەسكە سالايىق،  وتكەن دەمالىس كۇنى «شىمكەنت مۇناي ونىمدەرى» اق-نىڭ قويماسىنان ءورت شىعىپ، ءبىر جۇمىسشى قازا تاپقان ەدى. مارقۇم بولعان 46 جاستاعى ازامات وسى قويمادا وپەراتور بولىپ جۇمىس ىستەگەن.