الماتى وبلىسىنىڭ جامبىل اۋدانى اقسەڭگىر اۋىلدىق وكرۋگىنە قاراستى جايساڭ اۋىلىنداعى جەر داۋى جينالىسىنا جيىلعان تۇرعىندار. 26 ماۋسىم 2017 جىل، دەپ جازادى قامشى اقپاراتتىق اگەنتتىگى ازاتتىق راديوسىنا سىلتەمە جاساپ.

الماتى وبلىسىنىڭ جامبىل اۋدانى اقسەڭگىر اۋىلدىق وكرۋگىنە قاراستى جايساڭ اۋىلىندا جەر داۋىنان توبەلەس شىقتى. تالاسقا تۇسكەن جەر – اۋىل ىرگەسىندەگى «جايىلىم». جەردى جالعا العان - كاسىپكەر، «مالدى قايدا جايامىز؟» دەپ نارازى بولعاندار – 50-دەن استام ورالمان. كاسىپكەر وكىلى جەردى «جالعا العاندارىن» ايتادى، اكىمدىك ونى راستايدى. ال ورالماندار اكىمدىك بەرگەن جايىلىم «اۋىلدان الىس جانە ول جەردە سۋ جوق» دەيدى.

تۇرعىندار تالاسقا تۇسكەن جەردىڭ جايساڭ اۋىلىنىڭ باتىس ىرگەسىنەن باستالاتىنىن ايتادى. جەردى جالعا العان «توو مەدەۋ-كومەرس» مەكەمەسى مالىمەتتەرىنە قاراعاندا، جەردىڭ كولەمى - 300 گەكتار.

«مالدى قايدا جايامىز؟»

جايساڭدا نارازى تۇرعىندار اۋىل ورتاسىنا جينالدى. جيىلعان 50-دەن استام ورالماننىڭ پىكىرىنشە، «مال جاياتىن جەرلەرىن جەكە كاسىپكەر زاڭسىز پايدالانىپ جاتىر».

الماتى وبلىسى جامبىل اۋدانى جايساڭ اۋىلىنداعى ءشوپ تيەگەن كولىك. 26 ماۋسىم 2017 جىل.

تۇرعىندار سوزىنە قاراعاندا، اۋىل ىرگەسىنەن باستالاتىن دالانى ولار «جايىلىم رەتىندە پايدالانىپ كەلگەن». ءبىراق ءتورت جىل بۇرىن بۇل جەرگە تالاس باستالىپ، بيىل ول جەردى جالعا العان قوجالىق جىرتىپ تاستاعان. تۇرعىندار «جەردىڭ ەندى مال جايۋعا كەلمەي قالعانىن» ايتادى.

جوعارىداعىلاردىڭ ايتۋىنشا، اۋىل ماڭىنداعى جەردى جالعا بەرۋگە، ساتۋعا بولمايدى. كوكتەمدە وتكەن جينالىستا [كاسىپكەرگە] بۇدان باسقا جەردى بەرەمىز دەگەن. ەندى مىنە 100 مەتر عانا تاستاپ قويىپ وتىر.

ورالمانداردىڭ سوزىنشە، «جەردىڭ الەگىنەن بۇعان دەيىن دە بىرنەشە جينالىس وتكەن، سولاردىڭ بىرىندە اۋىل اكىمى ەرجان قوسىمشالوۆ جەردى جالعا العان كاسىپكەردەن ەگىستىكتى اۋىلدان «ءسال ءارى» سالۋدى سۇراعان». كاسىپكەردىڭ وعان قۇلاق اسپاعانى كورىنىپ تۇر، جالعا الۋشى جەردى كەي تۇرعىنداردىڭ اجەتحاناسىنىڭ تۇبىنەن باستاپ جىرتقان. جايساڭعا قىتايدان 2006 جىلى كوشىپ كەلگەنىن ايتقان تۇرعىن قاسەنحان ۇزاق:

- جوعارىداعىلاردىڭ ايتۋىنشا، اۋىل ماڭىنداعى جەردى جالعا بەرۋگە، ساتۋعا بولمايدى. كوكتەمدە وتكەن جينالىستا [كاسىپكەرگە] بۇدان باسقا جەردى بەرەمىز دەگەن. ەندى مىنە [بىزگە] 100 مەتر عانا تاستاپ قويىپ وتىر. ءبارىمىز بىردى-ەكىلى مالمەن كۇن كورىپ وتىرمىز. ال، جايىلىمنىڭ ءتۇرى مىناۋ، - دەيدى اۋىل شەتىن كورسەتىپ.

الماتى وبلىسىنىڭ جامبىل اۋدانى اقسەڭگىر اۋىلدىق وكرۋگىنە قاراستى جايساڭ اۋىلىنداعى داۋى جەردى جىرتىپ جۇرگەن تەحنيكا. 26 ماۋسىم 2017 جىل.

اۋىل تۇرعىندارى جەردى جالعا الۋشىلاردىڭ «ەگىستىك جەرگە مال كىرىپ كەتسە، ونى قاماپ قويىپ، ايىپپۇل تولەگەن سوڭ عانا، قايتاراتىنىن» ايتىپ شۋلاستى.

ال ءوزىن جەردى جالعا العان «مەدەۋ-كومەرس» ءجشس-ىنىڭ باس مامانى رەتىندە تانىستىرعان ارىستانبەك تاعايەۆ جەردىڭ مەملەكەتتىك اكتىسىن كورسەتىپ:

- اۋىلعا جاقىندا فەرما سالىنادى. سوعان بايلانىستى بۇل جەردە مال ازىعىن دايىنداپ جاتىرمىز. جەر مەملەكەتتىك باعدارلامامەن 49 جىلعا جالعا الىنعان. ال ەگىستىككە تۇسكەن مالدى قاماپ قويۋ تۋرالى زاڭ بيىل شىقتى، - دەدى.

الايدا تۇرعىندار كاسىپكەر وكىلى كورسەتكەن «قۇجاتتاردىڭ زاڭدىلىعىنا كۇمان كەلتىرەتىندەرىن»، «جەر يەلەرىنىڭ وتكەن جىلى دا ءبىراز مالدى قاماعانىن، قايتارۋ ءۇشىن 40 000 تەڭگە سۇراعاندارىن» ايتىپ، داۋرىعىسىپ كەتتى.

«جايىلىمدىق جەر بولىنگەن»

ال جينالىسقا كەلگەن اۋىل اكىمى ەرجان قوسىمشالوۆتىڭ سوزىنشە، «تۇرعىندارعا جايىلىمدىق جەر ءبولىنىپ بەرىلگەن، مال جاياتىن جەرگە قاتىستى ەشقانداي پروبلەما جوق».

- كاسىپكەردىڭ جالعا الىپ وتىرعان جەرى ءاۋ باستان ەگىستىككە ارنالعان، - دەدى ول.

الايدا ونىڭ بۇل ءسوزىن ەستىپ تۇرعان تۇرعىندار «جايىلىمعا بولىنگەن جەردىڭ اۋىلدان تىم الىستا جانە وندا سۋ جوق ەكەنىن» ايتىپ شۋلاستى. تۇرعىندار مالىمەتىنە قاراعاندا، جايىلىم دەپ اكىمدىك بەرگەن جەر «اۋىلدان 5-6 كيلومەتر قاشىقتا جاتىر».

جايىلىمعا جەر بولىنگەنىن ايتقان اۋىل اكىمى قوسىمشالوۆ جيىنعا تىلشىلەردىڭ كەلگەنىن كورىپ، تۇرعىندارعا "جۋرناليستەردى نەگە شاقىردىڭدار؟" دەپ كەيىپ، تەز كەتىپ قالدى. ودان كەيىن «مەدەۋ-كومەرس» ج ش س وكىلدەرى دە قايتۋعا بەيىمدەلدى. الايدا وسى كەزدە داۋلى جەردى كۇزەتەتىن قاراۋىل مەن اۋىل تۇرعىندارى اراسىندا ەرەگەس شىعىپ، بىر-بىرىنە قول سىلتەسكەن ەكى ادامدى اراشالاعان جۇرت شاڭ-شۇڭ بولدى دا قالدى. الگى ەكى ادامدى اجىراتقاننان كەيىن تۇرعىندار «ەندى جەر داۋىنا قاتىستى شاعىمدارىن سوتقا بەرەتىندەرىن، بيلىكتەگى «نۇر وتان» پارتياسى مەن اۋداندىق اكىمدىككە ارىز تۇسىرەتىندەرىن» ايتىپ تاراستى.

الماتى وبلىسىنىڭ جامبىل اۋدانى اقسەڭگىر اۋىلدىق وكرۋگىنە قاراستى جايساڭ اۋىلىنداعى جەر داۋى كەزىندە ەرەگەسىپ قالعان تۇرعىندار. 26 ماۋسىم 2017 جىل.

الماتى قالاسىنان 70-80 كيلومەتردەي جەردەگى جايساڭ اۋىلىندا شامامەن 400-دەي ءتۇتىن بار. سونىڭ ءجۇز شاقتى وتباسى - ورالماندار. تۇرعىندار ورتا ەسەپپەن «ءار ۇيدە ءىرىلى-ۇساقتى كەمىندە 20 باس مال بارىن» ايتادى. اۋىل ازاماتتارى «مال باعۋدان وزگە، كۇندەلىكتى ءناپاقالارىن ۇزىناعاشتا قارا جۇمىس ىستەپ تاباتىندارىن» باياندادى.

بۇل الماتى وبلىسى جامبىل اۋدانى اقسەڭگىر اۋىلدىق وكرۋگىندە ءبىرىنشى رەت شىعىپ تۇرعان جايىلىم داۋى ەمەس. 2016 جىلى كوكدالا اۋىلىنىڭ ءبىر توپ تۇرعىنى ازاتتىققا جايىلىم جەردىڭ داۋىن ايتىپ حابارلاسقان. ول جولى دا جەرگە تالاس كاسىپكەر مەن تۇرعىندار اراسىندا شىققان ەدى.