بۇگىن ق ر پارلامەنتى سەناتىنىڭ 16 دەپۋتاتىن سايلاۋ وتەدى، دەپ حابارلايدى قازاقپارات. «استانا ۋاقىتى بويىنشا ساعات 9-00-دەگى جاعدايعا سايكەس بارلىق 16 پۋنكت داۋىس بەرۋ ءۇشىن تولىقتاي جاراقتاندىرىلعان جانە جۇمىس ىستەۋگە دايىن.  تاڭداۋشىلاردىڭ ەلەكتروندى تىركەلۋى باستالدى. ول 10-00-گە دەيىن جالعاسادى جانە تاڭداۋشىلاردىڭ جينالىسى استانا ۋاقىتىمەن تۋرا ساعات 10-00-دە باستالادى. ءدال قازىرگى ۋاقىتتا election.gov.kz سايتىنان ونلاين رەجىمدە تاڭداۋشىلاردىڭ تىركەلۋىنە باقىلاي الاسىزدار. ەلىمىزدىڭ 16 وڭىرىنەن 16 سەنات دەپۋتاتى سايلانادى»، - دەدى ق ر ورتالىق سايلاۋ كوميسسياسىنىڭ مۇشەسى كونستانتين پەتروۆ.  بۇعان دەيىنگى تۇپكىلىكتى دەرەكتەرگە سايكەس، ەلىمىزدىڭ زاڭ شىعارۋشى ورگانىنىڭ جوعارعى پالاتاسىنىڭ 16 مانداتىنا وبلىستاردان، استانا مەن الماتى قالالارىنان 38 ۇمىتكەر تىركەلگەن. سايلاۋعا قاتىساتىن تاڭداۋشىلاردىڭ سانى - 3293. سەنات سايلاۋىن 288 حالىقارالىق بايقاۋشى قاداعالايدى.

تاڭداۋشىلاردىڭ سانى بويىنشا باسىم ايماقتاردىڭ قاتارىندا الماتى (333)، شىعىس قازاقستان (318) جانە وڭتۇستىك قازاقستان وبلىستارى (312) بار. ال استانا (25) مەن الماتى (36) قالالارىندا تاڭداۋشىلار سانى تومەن. قازىرگى ۋاقىتتا داۋىس بەرۋ بيۋللەتەنىنە 5 وڭىردە 3 كانديداتتان، 11 وڭىردە 2  كانديداتتان تىركەلگەن. تاڭداۋشىلار - ءماسليحات دەپۋتاتتارى بيۋللەتەن الۋ ارقىلى قاعاز تۇرىندە داۋىس بەرەدى. داۋىس بەرۋدى ۇيىمداستىرۋ جانە داۋىستاردى ەنگىزۋدە ايتارلىقتاي جاڭالىق جوق. ورتالىق سايلاۋ كوميسسياسىنىڭ ناتيجەسى بارلىق 16 وڭىرلىك كوميسسيادان حاتتامالار جينالعاننان كەيىن شىعارىلادى. «كونستيتۋسيالىق زاڭناماعا سايكەس ناتيجەنى شىعارۋ ءۇشىن بىزگە 7 كۇن ۋاقىت بەرىلگەن. مەنىڭشە، ناتيجەلەردى جيناعاننان كەيىن 7 كۇندى كۇتپەستەن دايىن بولۋىنا قاراي ەرتەڭ نە ارعى كۇنى جاريا ەتىپ قالارمىز»، - دەدى كونستانتين پەتروۆ ايتا كەتەرلىگى، سەناتتىڭ 47 دەپۋتاتى بار. ونىڭ 15ء-ىن پرەزيدەنت تاعايىندايدى. ال قالعان 32ء-سى ءار 3 جىل سايىن ءار وڭىردەن ەكىدەن سايلانادى.