پاۆلوداردا كۋاگەرلەر جانتۇرشىگەرلىك وقيعا جايلى ايتىپ بەردى، - دەپ حابارلايدى Tengrinews.kz. 1 مامىر كوشەسىندەگى كوپقاباتتى ۇيلەردىڭ ءبىرىنىڭ كىرەبەرىسىنەن ىشىندە ءسابي جاتقان قاعاز پاكەت تابىلعان. پاكەتتى جەرگىلىكتى   پاتەر يەلەرى كووپەراتيۆىنىڭ اۋلا سىپىرۋشىسى تاۋىپ العان. كۋاگەرلەردىڭ ايتۋىنشا، ۇيلەردىڭ ءبىرىنىڭ الدىندا قالدىرىلعان پاكەتتىڭ ىشىندەگى ءسابي ءولى بولعان. "بۇگىن تاڭەرتەڭ اۋلا سىپىرۋشى كىرەبەرىس جەردەگى قوقىستاردى شىعارىپ تاستاماقشى بولدى. سودان ءبىر پاكەتتى بايقاعان، قاراسا ىشىندە ءولى ءسابي جاتىر. بىردەن پوليسيا شاقىردىق. باسقا ەشتەڭە بىلمەيمىز"، - دەدى تۇرعىندار.

سونداي-اق، تۇرعىنداردىڭ ايتۋىنشا، ولار وزدەرىنىڭ ۇيىندە جۇكتى ايەلدى بايقاماعان. "بۇل پاكەتتى بىزگە بىرەۋلەر قالدىرىپ كەتكەن بولۋى مۇمكىن"، - دەيدى ولار. راستالماعان مالىمەتتەرگە سۇيەنسەك، بالا شالا تۋىلعان. وڭىرلىك پوليسيا دەپارتامەنتىنىڭ باسپا ءسوز قىزمەتى ازىرشە ەشقانداي پىكىر بىلدىرگەن جوق.