2017 جىلعى 28 ماۋسىمدا ۆارشاۆاداعى پرەزيدەنت سارايىندا قازاقستان رەسپۋبليكاسىنىڭ پولشا رەسپۋبليكاسىنداعى توتەنشە جانە وكىلەتتى ەلشىسى مارعۇلان بايمۇحاننىڭ پولشا رەسپۋبليكاسىنىڭ پرەزيدەنتى اندجەي دۋداعا سەنىم گراموتالارىن تاپسىرۋ ءراسىمى ءوتتى، دەپ جازادى قامشى اقپاراتتىق اگەنتتىگى.

سالتاناتتى راسىمنەن كەيىن ورىن العان سۇحبات بارىسىندا وتاندىق ديپلومات قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ سالەمدەمەسى مەن يگى تىلەكتەرىن جەتكىزدى.

ا. دۋدا قازاقستان كوشباسشىسىنىڭ ىستىق ىقىلاسىنا ريزاشىلىق پەن العىسىن ءبىلدىرىپ، ونىڭ بىلتىر تامىز ايىنداعى ۆارشاۆاعا مەملەكەتتىك ساپارى ەكىجاقتى قاتىناستارداعى اسا ماڭىزدى وقيعا بولعانىن جانە ەكىجاقتى ىنتىماقتاستىقتىڭ دامۋىنا قوسىمشا قۋات بەرگەنىن اتاپ ءوتتى.

پولشا پرەزيدەنتىنىڭ ايتۋىنشا، سول كەزدە قول جەتكىزگەن ۋاعدالاستىقتاردىڭ ارقاسىندا ءۇ.ج. 1 قاڭتارىنان باستاپ پولياك ازاماتتارىنىڭ قازاقستانعا بارۋ ءۇشىن ۆيزاcىز ساپار شەگۋ ءتارتىبى جانە ءۇ.ج. 29 مامىرىنان باستاپ ەكى ەلدىڭ استانالارى اراسىندا تىكەلەي اۋە قاتىناسى ورناتىلدى. ا. دۋدا ەكىجاقتى ەكونوميكالىق ىنتىماقتاستىقىڭ ەلەۋلى دامۋىن قازاقستان پرەزيدەنتىنىڭ مەملەكەتتىك ساپارىنىڭ اسا ماڭىزدى ناتيجەلەرىنىڭ ءبىرى بولىپ تابىلاتىن ريزاشىلىقپەن اتاپ ءوتتى. پولياك مەملەكەتىنىڭ باسشىسى بۇۇ قاۋىپسىزدىك كەڭەسىنىڭ 2018-2019 جىلدارى تۇراقتى ەمەس مۇشەسى بولىپ سايلانۋىنا ۆارشاۆا كانديداتۋراسىن قولداعانى ءۇشىن قازاقستان تاراپىنا العىس ءبىلدىردى.

پولياك مەملەكەتى باسشىسىنىڭ پىكىرىنشە، ەكسپو-2017 كورمەسى ءوزارا بايلانىستاردىڭ ودان ءارى دامۋىنا جاڭا سەرپىن بەردى. پولشا دا 2022 جىلى لودز قالاسىندا وسىنداي حالىقارالىق ماماندىرىلعان كورمەنى وتكىزۋ قۇقىعىنا يە بولۋعا نيەتتى. استاناداعى حالىقارالىق كورمەدە پولياك پاۆيلونى ورناتىلىپ، وندا وتكىزىلەتىن ءىس-شارالاردىڭ قانىقتىرىلعان جوسپارى جاسالعان. ا. دۋدا ەكسپو-2017 اياسىندا وتكىزىلەتىن پولشا ۇلتتىق كۇنىنە قاتىسۋ ءۇشىن قىركۇيەك ايىنىڭ باسىندا قازاقستانعا ساپارىن جوسپارلاپ وتىرعانىن راستادى.

استاناعا ساپارىنىڭ تاعى دا ءبىر سەبەبى، ول قازاقستان-پولشا بيزنەس – فورۋمىنا قاتىسۋ. ونىڭ جۇمىسىنا پولشادان ءىرى قاسىپكەرلەردەن جاساقتالعان توپتىڭ قاتىسۋى كوزدەلۋدە. پولياك مەملەكەتىنىڭ باسشىسى، ونىڭ قازاقستان استاناسىنا ساپارىنىڭ شەڭبەرىندە وتەتىن ىسكەرلىك فورۋم ەكىجاقتى ەكونوميكالىق ىنتىماقتاستىقتىڭ دامۋ فاكتورىنا اينالاتىنىنا ءۇمىت ارتاتىنىن ءبىلدىردى.

كەزدەسۋ سوڭىندا پولشا پرەزيدەنتى ا. دۋدا قازاقستان پرەزيدەنتى ن. نازاربايەۆقا زور دەنساۋلىق پەن تابىس تىلەكتەرىن جەتكىزۋدى سۇراپ، قازاقستان كوشباسشىسىمەن قازاق جەرىندە جاقىن ارادا كەزدەسۋىنە ءۇمىت ارتاتىنىن ءبىلدىردى.