الداعى 2-3 جىل ىشىندە قازاقستان مەن ازەربايجاننىڭ ءوزارا ساۋدا اينالىمى ۇلعايادى. بۇل تۋرالى قامشى اقپاراتتىق اگەنتتىگى 24.kz-كە سىلتەمە جاساپ حابارلايدى. ەكونوميكالىق بايلانىستى ارتتىرا ءتۇسۋ ماقساتىندا ەكى ەلدىڭ وندىرۋشىلەرى ءجيى باس قوسىپ، قوس تاراپقا دا ءتيىمدى شارتتارعا قول قويىلىپ جاتىر. ازەربايجاندىقتار قازاقستاندى الەۋەتى جوعارى ماڭىزدى ساۋدا ارىپتەس رەتىندە قاراستىرادى. بىلتىر ەكى ەلدىڭ اراسىنداعى ساۋدا اينالىمى 124 ملن دوللاردان استى. ونىڭ الدىنداعى جىلمەن سالىستىرعاندا بۇل كورسەتكىش 8%-عا ءوسىپ وتىر. الايدا الەمدەگى ەكونوميكالىق احۋال تومەندەمەس بۇرىن ەكى جاقتى ساۋدا 3 ەسە ارتىق بولعان. ءقازىر تاراپتار بۇرىنعى ىنتىماقتاستىق دەڭگەيىنە قايتۋ جولدارىن قاراستىرماق.

رۋفات مامەدوۆ، ازەربايجاننىڭ ەكسپورتتى قولداۋ جانە ينۆەستيسيالار قورىنىڭ باسشىسى: - ءبىز قازاقستاننىڭ ءبىرقاتار وڭىرىمەن ەكسپورتتى رەتتەۋدى جوسپارلاپ وتىرمىز. تەك اۋىل شارۋاشىلىعى ونىمدەرىن عانا ەمەس، ونەركاسىپتىك تاۋارلاردى دا جىبەرەمىز. قازاقستاندىق وندىرۋشىلەردى ءوز ەلىمىزگە شاقىرىپ، بىرنەشە كەلىسىمگە قول قويدىق.

مەملەكەتتىك ستاتيستيكا كوميتەتىنىڭ مالىمەتتەرىنە ۇڭىلسەك، 2017 جىلدىڭ ءقاڭتار-ساۋىر ايلارىندا قازاقستاننىڭ ازەربايجانعا ەكسپورتى جالپى شەتەلگە جىبەرىلگەن تاۋارلاردىڭ 2،5%-ىن قۇرايدى. وتكەن جىلمەن سالىستىرعاندا بۇل كورسەتكىش 2%-عا ارتىق. ءازىربايجاننىڭ دا بۇل باعىتتاعى جەتىستىكتەرى از ەمەس. جەرگىلىكتى ەكونوميكالىق رەفورمالاردى تالداۋ ورتالىعىنىڭ مالىمەتتەرىنە سۇيەنسەك، قازاقستان ەكسپورتتىق تاپسىرىستار كولەمى بويىنشا كوش باستاپ تۇرعان 5 ەلدىڭ قاتارىنا كىرەدى. جاقىندا ءازىربايجانعا جاڭا قازاقستاندىق ەلەكتروۆوزدار جەتكىزىلە باستايدى. بۇل تۋرالى كەلىسىم 3 جىل بۇرىن جاسالعان.

 ەكونوميكالىق بايلانىستى ءارى قاراي نىعايتۋ جوسپارى ۇكىمەتارالىق كوميسسيانىڭ كەلەسى وتىرىسىندا قۇرىلادى. ول ءۇشىن ارنايى جول كارتاسى ازىرلەندى.

شولۋشى: ايگەرىم تاۋباي