بۇگىن پارلامەنت پالاتالارىنىڭ بىرلەسكەن وتىرىسى ءوتىپ، التىنشى رەت سايلانعان پارلامەنت  ەكىنشى سەسسياسىن اياقتادى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ. 

«قاي كەزەڭدە بولسا دا ەلىمىز ءۇشىن ءارقاشاندا زاڭنىڭ ورنى ەرەكشە، ماڭىزى وتە زور. بۇگىن ءبىز سول زاڭداردى شىعاراتىن ەلىمىزدەگى ەڭ جوعارى وكىلەتتى ورگان قوس پالاتالى پارلامەتتىڭ كەزەكتى سەسسياسىن اياقتاپ وتىرمىز. التىنشى شاقىرىلعان پارلامەنتتىڭ ەكىنشى سەسسياسى وتە ماڭىزدى جانە تاريحي كەزەڭدە ءوتتى دەۋگە بولادى»،-دەپ توقتالدى ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين. وسىعان وراي ول ءداستۇر بويىنشا اتقارىلعان جۇمىستارعا ەسەپ بەرىپ، بولاشاق جوسپارلارمەن بولىسە كەلە، قازاقستان رەسپۋبليكاسى تاۋەلسىزدىگىنىڭ 25 جىلدىعى دەكلاراسياسى قابىلدانعانىن، ءىرى كونستيتۋسيالىق رەفورمالار جۇرگىزىلگەنىن ەسكە سالىپ ءوتتى. بۇل تىكەلەي حالقىمىزدىڭ بولاشاعى ءۇشىن جاسالعان وتە ماڭىزدى قادام.

 «وسىنداي وتە جاۋاپتى كەزەڭدە پارلامەنت دەپۋتاتتارى پرەزيدەنتىمىزدىڭ ەكىنشى سەسسيانىڭ اشىلۋىندا العا قويعان ستراتەگيالىق تاپسىرمالاردى جۇزەگە اسىرۋعا بەلسەنە ارالاستى. ەكىنشى سەسسيادا قوس پالاتانىڭ التى بىرلەسكەن وتىرىسى، ءماجىلىستىڭ  38 جانە سەناتتىڭ 25 جالپى وتىرىستارى ءوتتى. بۇل كەزەڭدە پارلامەنت قاراۋىندا 111 زاڭ جوباسى بولدى، ونىڭ 84ء-ى قابىلداندى. ولاردىڭ ىشىندە 15 زاڭ جوباسىنا ءبىزدىڭ دەپۋتاتتارىمىز وزدەرى باستاماشى بولدى. پارلامەنت  قابىلدانعان 66 زاڭعا بۇگىنگى كۇنى پرەزيدەنت قول قويىپ، ولار ءوز كۇشىنە ەندى»،-دەدى ءماجىلىس ءتوراعاسى.

شولۋشى: ايگەرىم تاۋباي