بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسيا بارىسىندا ق ر ءبىلىم جانە عىلىم مينيسترلىگى ۇلتتىق تەستىلەۋ ورتالىعىنىڭ ديرەكتورى رامازان ءالىمقۇلوۆ باياندادى دەپ حابارلايدى قامشى اقپاراتتىق اگەنتتىگى. 

«ەڭ جوعارى بالل جيناعان الماتى قالاسىنداعى «م.ماقاتايەۆ اتىنداعى №140 گيمنازيا» كمم ءبىتىرۋشىسى تاسان سايات ەلتاي ۇلى. ول 139 بالل جينادى. سونىمەن قاتار، 7 ادام – 138 بالل جينادى. 2017 جىلى ۇبت وتكىزۋ بارىسىنداعى بارلىق ءىس-شارا شتاتتىق تارتىپتە ءوتتى. حالىق ۇبت جاڭا فورماتىن جاقسى قابىلدادى»، - دەدى ول.

سپيكەردىڭ سوزىنشە قازاقستان بويىنشا بەس پاننەن ورتاشا بالل 80،5% قۇراعان. بىلتىرعى جىلعى كورسەتكىش 81% بولعان. «شەكتىك دەڭگەيدەن، ياعني 50 بالل العان 74 517، ونىڭ ىشىندە 60-65 بالل 5935، 66-119 بالل 52 717، 120 – 139 بالل 5 064. شەكتىك دەڭگەيدەن وتە الماعاندار سانى 14 066 ادام»، - دەدى ر.ءالىمقۇلوۆ. 

جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى گۇلزات كوبەنوۆانىڭ مالىمەتىنشە قاجەتتى بالدى جيناي الماعان تۇلەكتەرگە ءبىلىم جانە عىلىم مينيسترلىگى وتكەن جىلعىداي ۇبت مەن كەشەندى تەستىلەۋدى قايتالاۋ تۇرىندە قايتادان تاپسىرۋعا مۇمكىندىك بەردى. «ول ءۇشىن تالاپكەرلەر تامىز ايىنىڭ 1-9 ارالىعىندا جوو-نا بارىپ، ءوز قۇجاتتارىن تاپسىرۋى ءتيىس. ەگەر دە قايتالاۋدى تاپسىرعان كەزدە كەرەكتى بالدى تاعى دا جيناي الماي قالاتىن بولسا، وندا جوو-نا بارىپ ءبىر سەمەسترگە شارتتى تۇردە الۋىنا ءوتىنىش بىلدىرۋىگە بولادى. قابىلدانعان جاعداي دا ءبىر سەمەستردى اقىلى تۇردە وقىپ، قىستا كەشەندى تەستىلەۋدى قايتا تاپسىرۋى كەرەك. بۇل جەردە تۇلەكتىڭ بىلىمگە دەگەن قۇشتارلىعى مەن اتا-اناسىنىڭ جاۋاپكەرشىلىگى ماڭىزدى ورىن الادى»، - دەدى سپيكەر.

شولۋشى: اسەم المۇحانبەت