الماتى قالاسىنىڭ تۇرعىنى ابزال مىرزاش 7 جىلدا مەكتەپ باعدارلاماسىن ءتامامداپ، 12 جاسىندا مەكتەپتى ۇزدىك ءبىتىرىپ شىقتى،- دەپ جازادى قامشى اقپاراتتىق اگەنتتىگى stan.kz-كە سىلتەمە جاساي وتىرىپ. ۆۋندەركيند بالا ۇلتتىق ءبىرىڭعاي تەستىلەۋدەن دە جوعارعى بالل الىپ، جوعارى وقۋ ورنىنىڭ ستۋدەنتى اتانعالى وتىر. الايدا وقۋشىنىڭ اتا-اناسى ءبىلىم مينيسترلىگىنە وكپەلى. سەبەبى مەكتەپتى جەدەلدەتىپ ءبىتىرىپ شىققان بالاعا التىن بەلگى دە، قىزىل اتتەستات تا بەرىلمەيدى ەكەن.
ابزالعا سىرتتان قاراساڭىز بالالارمەن اسىر سالىپ ويناپ جۇرگەن قاراپايىم ءجاسوسپىرىم سياقتى. ءبىراق ونىڭ ءبىلىم دەڭگەيى وزىنەن بىرنەشە جاس ۇلكەن بالالاردان دا ارتىق ەكەنىن بىرەۋ بىلسە، بىرەۋ بىلمەس. دالاداعى دوستارىنان قىسىلىپ تۇرىپ سۇحبات بەرگەن بالا بولاشاقتا اقش-تا ءبىلىم العىسى كەلەتىنىن ايتتى.
«ماماندىقتار تۋرالى ىزدەستىرە كەلە، IT-تەحنولوگيا سالاسىن تاڭدادىم»، – دەيدى ول.
ابزال دارىگەرلەر وتباسىنىڭ تۇڭعىشى. ونىڭ بىلىمگە دەگەن قۇشتارلىعىن اتا-اناسى كىشكەنتاي كەزىندە-اق بايقاپتى. ول ءۇش جاسىندا ءارىپ تانىپ، كىتاپ وقىسا، ءتورت جاسىندا كوبەيتۋ كەستەسىن جاتقا ايتىپتى.
«ادامدار، تابيعات، جان-جانۋارلار تۋرالى ەنسيكلوپەديا كىتاپتارىن بالاعا اكەلىپ بەردىم. سوسىن سول كىتاپتاردى وزدىگىنەن وقىپ، يگەرە باستادى»، – دەيدى اكەسى داۋرەنبەك نىسانوۆ.
بۇل وتباسىنىڭ ءۇش بالاسى دا مەكتەپكە بەس جاسىنان بارعان ەكەن. ءبارى دە ۇزدىك وقيدى. ال ابزالدىڭ اقىلدىلىعى سونشا ءبىر جىلدا ەكى جىلدىق مەكتەپ باعدارلاماسىن وپ-وڭاي مەڭگەرىپ الاتىن. ونىڭ رەسپۋبليكالىق، حالىقارالىق وليمپيادالارعا قاتىسىپ جۇلدە العان ديپلومدارىندا ءتىپتى سان جوق. الايدا ەلىمىزدە ۆۋندەركيند بالالارعا كورسەتىلەتىن ءىلتيپات ازداۋ سياقتى.
«قالا اكىمى بۇكىل التىن بەلگى يەگەرلەرىنە سالتاناتتى تۇردە ماراپاتتارىن تابىستادى. سونى كورىپ مەنىڭ دە بالام نەگە سالتاناتتى تۇردە الىپ، سولاردىڭ ىشىندە جۇرمەدى دەپ كىشكەنە قىنجىلدىم»، – دەيدى اناسى جازيرا دوسكەيەۆا.
كۇزدە ابزال ستۋدەنت اتانباق. قازاق-بريتان تەحنيكالىق ستۋدەنتى بالانىڭ ۇبت-دان العان بالى گرانتقا جەتپەسە، ۋنيۆەرسيتەتتىڭ ىشكى گرانتىن بولەمىز دەپ ۋادە بەرىپتى. زەرەك ۇل بۇل تۇرىمەن جوعارى وقۋ ورىنىن دا بىر-ەكى جىلدا ءبىتىرىپ شىعۋى ابدەن مۇمكىن.
شولۋشى: اسەل بولات قىزى
