اقتوبە وبلىسىنىڭ مارتوك اۋدانىندا «پوليسەيدىڭ قورلىعىنا» شىداماعان بۇرىنعى سوتتالۋشى وز-وزىنە قول جۇمسادى. 43 جاستاعى ەر ادام ۇستىنە بەنزين قۇيىپ، ءوزىن تىرىلەي ورتەپ جىبەردى دەپ حابارلايدى قامشى اقپاراتتىق اگەنتتىگى kerek-info.kz-كە سىلتەمە جاساي وتىرىپ.

اقتوبەلىك ابزال جاقسىلىقوۆ بۇرىن بۇزاقىلىق جاساعانى جانە كىسى ولتىرگەنى ءۇشىن سوتتالعان. وسىدان ەكى جىل بۇرىن جازاسىن وتەپ، اباقتىدان بوساپ شىققان ول جاڭادان ءومىر باستاعىسى كەلەدى. 43 جاستاعى جىگىت اقتوبە وبلىسىنىڭ مارتوك اۋدانىنا قونىس اۋدارعان. ءتىپتى وتباسىن قۇرىپ، جۇمىسقا دا تۇرعان. الايدا، ايتۋىنشا، وعان ۋچاسكەلىك ينسپەكتور كۇن كورسەتپەپتى. ءار نارسەنى سىلتاۋراتىپ تۇرتپەكتەي بەرەتىن كورىنەدى. 

- قوستاناي وبلىسىنىڭ جەتىقارا قالاسىنداعى تۇرمەدە جازامدى وتەدىم. اباقتىدان شىققاننان كەيىن اكەمنىڭ ءبىر ايەلمەن مارتوكتە تۇرىپ جاتقانىن ەستىدىم. قوناققا بارىپ، كەيىن سوندا كوشىپ باردىم. ءبىر ايەلمەن تانىسىپ، وتباسى قۇردىم. مارتوك اۋداندىق مادەنيەت ۇيىنە سانتەحنيك بولىپ جۇمىسقا تۇردىم. ءومىرىم رەتكە كەلىپ، جاقسى جاعىنا قاراي وزگەرىپ كەلە جاتىر ەدى. الايدا ۋچاسكەلىك ينسپەكتور الماس جۇمابايەۆ مەنى ورىنسىز مازالاپ، تۇرتپەكتەي باستادى،-دەيدى ول. 
ابزالدىڭ ايتۋىنشا، پوليسيا قىزمەتكەرى وعان كەز-كەلگەن نارسەنى سىلتاۋراتىپ، ءجيى تيىسەدى. «شىدامنىڭ دا شەگى بار عوي. اقىرى وز-وزىمە قول جۇمساۋعا ءماجبۇر بولدىم»، - دەيدى ول.  

- بۇعان دەيىنگى پوليسيا قىزمەتكەرلەرى مازالامايتىن ەدى. الايدا وسى جىگىت كەلگەننەن كەيىن ماعان كۇن كورسەتپەدى. اۋداندا قانداي دا ءبىر قىلمىس تىركەلسە، مەنى كۇن دەمەي، ءتۇن دەمەي مازالايدى. ءوزى مەنەن 20 جاستاي كىشى. سوتتالعانىمدى سىلتاۋراتىپ، ماعان ۇنەمى قوقان-لوقى كورسەتەدى. جۇمىس ىستەپ جاتقانىما قاراماستان، پوليسيا ۋچاسكەسىنە تەز ارادا جەتۋىمدى ايتىپ، جۇگىرتىپ قويادى. ۇيىمە دە كەلەدى. مەنى سوت شەشىمىمەن 3 جىلعا كولىك جۇرگىزۋ قۇقىعىنان ايىرعان. سوعان قاراماستان، مەنى ءوز شارۋالارىمەن كولىك جۇرگىزۋگە ماجبۇرلەدى. قاقپا جاساتتى. وقيعا بولعان كۇنى، 1 ماۋسىمدا مەن ءوز ۇيىمدە ۆەلوسيپەد جوندەپ جاتقانمىن. ۋچاسكەلىك ينسپەكتور كەلدى. مەنىڭ تەمەكى تۇقىلىن كوشەگە تاستاعان ءساتىم بەينەكامەراعا تىركەلگەنىن ايتىپ، ءتيىستى. سوڭىرا ىشىمدىك ىشكەنىم ءۇشىن پوليسيا بولىمشەسىنە مەديسينالىق كۋالاندىرۋعا بارۋىمدى سۇرادى. ىشىمدىك ىشكەن جوقپىن. ىشكەن كۇننىڭ وزىندە، كوشەدە قۇلاپ جاتقانىم جوق، ءوز ۇيىمدەمىن عوي. مەنى ۋچاسكەلىك بولىمشەگە الىپ كەلدى. مەن مەديسينالىق كۋالاندىرۋدان وتۋدەن باس تارتتىم. اقىرى ۇزدىكسىز مازالاعاندىقتان، جۇيكەم سىر بەردى. سول ءۇشىن جولداسىممەن دە ءجيى ۇرىسىپ قالامىز. ۇيگە كەلىپ، ۇستىمە بەنزين قۇيىپ، ورتەپ جىبەردىم،-دەيدى ابزال. 

وسىدان كەيىن ەر ادام وبلىستىق جەدەل جاردەم اۋرۋحاناسىنا جەتكىزىلگەن. جان ساقتاۋ بولىمىندە 7 كۇن جاتىپ، ەسىن جيىپتى. ءقازىر دەنساۋلىعى تۇزەلىپ، بەتى بەرى قاراپ كەلەدى. 
- ءقازىر جاسىم 43-تە. ونىڭ 21 جىلىن تۇرمەدە وتكىزدىم. ءومىرىمنىڭ جارتىسى ءوتىپ كەتتى دەۋگە بولادى. ءوزىمنىڭ جاساعان ءىسىمدى موينىممەن كوتەرىپ، جازامدى وتەدىم. ومىرىمدە العاش رەت ۇيلەندىم. ادام قاتارىنا قوسىلىپ، تىنىش ءومىر سۇرەمىن دەگەنمىن،-دەپ كۇيىنەدى بۇرىنعى سوتتالۋشى. 

الايدا بۇل دەرەككە قاتىستى وبلىستىق ءىىد-نىڭ ايتار ءوز ءۋاجى بار. 
- شاعىمدانۋشى بۇعان دەيىن بىرنەشە رەت، ونىڭ ىشىندە كىسى ولتىرگەنى ءۇشىن سوتتالعان. ابزال جاقسىلىقوۆ 2015 جىلدىڭ 3 ماۋسىمىندا كA-161/3 مەكەمەسىنەن شارتتى تۇردە مەرزىمىنەن بۇرىن بوساپ شىققان. سول سەبەپتى ۋچاسكەلىك ينسپەكتور وعان باقىلاۋ جۇرگىزۋى كەرەك. جاقسىلىقوۆقا بىرنەشە رەت اكىمشىلىك قۇقىق بۇزۋشىلىق جاساعان جاعدايدا سوت ارقىلى شارتتى تۇردە مەرزىمىنەن بوساتۋدىڭ كۇشى جويىلاتىندىعى ەسكەرتىلدى. الايدا بۇرىنعى سوتتالۋشى پروفيلاكتيكالىق ەسەپتە تۇرعانىنا قاراماستان، ىشىمدىك ىشكەن كۇيى كولىك جۇرگىزگەن. سونداي-اق وزىنە بەلگىلەنگەن شەكتەۋدى بۇزىپ تۇنگى ساعات 22.00-دەن كەيىن تۇراقتى مەكەنجايىندا بولماعان،-دەپ حابارلايدى ءىىد-ىنىڭ باسپا ءسوز قىزمەتى.
پوليسەيلەر وقيعا بولعان كۇنى ونى ۇيىندە ىشىمدىك ءىشىپ،قيقار مىنەز كورسەتكەندىگىن ايتادى. ءتارتىپ ساقشىسىنىڭ ەسكەرتۋىنە قۇلاق اسپاي، تەمەكى تۇقىلىن لاقتىرىپتى. وسى وقيعاعا قاتىستى تەكسەرۋ جۇرگىزىلگەن.الايدا مارتوك اۋداندىق ءىىب جەرگىلىكتى پوليسيا قىزمەتىنىڭ ۋچاسكەلىك ينسپەكتورى الماس جۇمابايەۆتىڭ ارەكەتىنەن ەشقانداي زاڭسىزدىق تابىلمادى. ءىىد باسپا ءسوز قىزمەتىنىڭ حابارلاۋىنشا، ۋچاسكەلىك ينسپەكتورعا نەگىزسىز ايىپ تاعىلىپ وتىر.

شولۋشى: اسەل بولات قىزى