قىزىلوردادا ينتەرنەت ارقىلى ءدىني الاۋىزدىقتى تۋعىزباق بولعان ەر ادام جاۋاپكەرشىلىككە تارتىلدى، - دەپ حابارلايدى قامشى اقپاراتتىق اگەنتتىگى  قىزىلوردا وبلىستىق ءىىد باسپا ءسوز قىزمەتىنە سىلتەمە جاساپ.

باسپا ءسوز قىزمەتىندەگىلەردىڭ مالىمەتىنشە، بۇل وقيعا 2017 جىلدىڭ ناۋرىزىندا بولعان. "قىزىلوردا وبلىسىنىڭ ءىىد ەكسترەميزمگە قارسى ءىس-قيمىل باسقارماسى قىزمەتكەرلەرى جۇرگىزگەن كەشەندى ءىس-شارالاردىڭ ناتيجەسىندە عالامتور جەلىسىندەگى الەۋمەتتىك پاراقشاسى ارقىلى ءدىني الاۋىزدىقتى قوزدىرۋعا باعىتتالعان قاساقانا ارەكەتتەر جاساعان قىزىلوردالىق 26 جاستاعى تۇرعىن ۇستالدى. ەر ادامعا قاتىستى قىلمىستىق ءىس قوزعالىپ، ونىڭ دەسترۋكتيۆ ءدىني اعىمنىڭ ۇستانۋشىسى ەكەندىگى انىقتالدى"، - دەپ حابارلادى باسپا ءسوز قىزمەتىندەگىلەر.

ساراپتامالار تاعايىندالىپ، ايعاق زات رەتىندە اۋديوجازبالار الىنىپ، ءبىرقاتار جەدەل ءىس-شارا جۇرگىزىلدى. ناتيجەسىندە ەر ادام 2017 جىلدىڭ 5 ماۋسىمىندا سوتتىڭ شەشىمى بويىنشا ق ر قىلمىستىق كودەكسىنىڭ 174-بابى 1-بولىگىنە سايكەس كىنالى دەپ تانىلىپ، 2 جىلعا شارتتى تۇردە سوتتالدى.

شولۋشى: اسەل بولات قىزى