تايلاندتا 30 جاستاعى بەلگيالىق ءتۋريستىڭ ءولىمى تەكسەرىلۋدە. ونىڭ كەسىرتكە كەمىرىپ تاستاعان سۇيەگى ءساۋىر ايىنىڭ سوڭىندا تاۋ ارالىنان تابىلعان بولاتىن. پوليسيا ونىڭ تۋىستارىنا بويجەتكەن وز-وزىنە قول سالعانىن حابارلاعان، الايدا ەليزانىڭ وتباسى بۇعان سەنبەيدى، دەپ جازادى قازاقپارات. كەسىرتكە  داللەمانگەنىڭ دەنەسىن كەمىرىپ تاستاعانى سونشالىق، ونى ستوماتولوگيالىق ساراپتامانىڭ كومەگىمەن عانا انىقتاۋ مۇمكىن بولدى.

قىزدىڭ اتا-اناسىنىڭ ايتۋىنشا، ول سوڭعى ايلاردا الەمدى شارلاپ، يوگانى ۇيرەنىپ، مەديتاسيامەن اينالىسىپ جۇرگەن. سوڭعى رەت تۋىستارىمەن قايتىس بولاردان بىرنەشە كۇن بۇرىن «سكايپ» ارقىلى سويلەسكەن. ونىڭ كوڭىل-كۇيى كوتەرىڭكى، جانعا جايلى جەردە تابيعاتپەن ۇندەسىپ ءومىر ءسۇرىپ جاتقانىنا باقىتتى بولعان. ەليزانىڭ دەنەسىنىڭ جانىنان ونىڭ ولەر الدىندا جازۋى مۇمكىن حاتتىڭ تابىلماۋى - اتا-اناسىنىڭ كۇدىگىن تۋدىرۋدا. جۋرناليستەردىڭ پايىمىنشا، پوليسەيلەر تۋريستەردى شوشىتىپ الماس ءۇشىن شەتەلدىك قىزدىڭ ناقتى قالاي قازا تاپقاندىعىن جاريالاماي وتىر. سوڭعى ءۇش جىلدا تاۋ ارالىندا جەتى ادام اجال قۇشتى. ولاردىڭ بارلىعى ۇزىندىعى ءۇش مەترگە جەتەتىن كەسىرتكەنىڭ  قۇربانى بولعان. ولاردىڭ ۋى كوپ جاعدايدا ولىمگە الىپ كەلەدى.