تاياۋدا عانا ەلىمىزدە مەكتەپ تۇلەكتەرىنىڭ ۇلتتىق ءبىرىڭعاي تەستىلەۋى اياقتالعانى بەلگىلى. الايدا، سىناققا قاتىسقانداردىڭ بارلىعى بىردەي ءتيىستى مەجەنى باعىندىرا المادى. سونداي تۇلەكتەرگە، ياعني ۇبت-عا قاتىسپاعان جانە شەكتىك دەڭگەيگە جەتە الماعان جاستارعا قولداۋ كورسەتىپ، ومىردەن ءوز ورنىن تابۋ ءۇشىن ءجون سىلتەۋ ماقساتىندا بىلتىر «نۇر وتان» پارتياسى ەلباسىنىڭ تاپسىرماسىمەن «ءساتتى قادام» جوباسىن قولعا العان بولاتىن. بيىل دا اتالعان باستاما ءوز جالعاسىن تاپپاق.

سوعان وراي بۇگىن «نۇر وتان» پارتياسىنىڭ ورتالىق اپپاراتىندا «ءساتتى قادام» پارتيالىق جوباسىنىڭ ءۇشىنشى باعىتىن جۇزەگە اسىرۋ ماقساتىندا «نۇر وتان» پارتياسى مەن ءبىلىم جانە عىلىم مينسترلىگى، ەڭبەك جانە حالىقتى الەۋمەتتىك قورعاۋ مينيسترلىگى جانە ءدىن ىستەرى جانە ازاماتتىق قوعام مينيسترلىكتەرى اراسىندا جاڭارتىلعان ءتورتجاقتى مەموراندۋمعا قول قويىلدى.

وتىرىس «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ توراعالىعىمەن ءوتتى. شاراعا اتالعان مينيسترلىك باسشىلارى ەرلان ساعادييەۆ، تامارا دۇيسەنوۆا، نۇرلان ەرمەكبايەۆ پەن جاۋاپتى مەملەكەتتىك ورگاندار وكىلدەرىنەن قۇرىلعان جۇمىس توبىنىڭ مۇشەلەرى، پارتيانىڭ وڭىرلىك فيليالدارى مەن «جاس وتان» جاستار قاناتىنىڭ وكىلدەرى قاتىستى.

جوبانىڭ ماڭىزى جونىندە ايتقان مۇحتار قۇل-مۇحاممەد: «ەلباسىمىزدىڭ تاپسىرماسىن ورىنداۋ ءۇش ۇلكەن ماسەلەنىڭ ءتۇيىنىن شەشۋگە مۇمكىندىك بەرەدى: مەكتەپ بىتىرگەن جاستار مەملەكەتتىڭ قامقورلىعىن سەزىنىپ، بىردەن جۇمىسپەن قامتىلادى؛ ماماندىق يگەرەدى جانە جاڭادان اشىلعان كاسىپورىندار جۇمىس كۇشىمەن قامتاماسىز ەتىلەدى. بىردە ءبىر مەكتەپ ءبىتىرۋشى ءبىزدىڭ نازارىمىزدان تىس قالماۋى كەرەك. بۇل قوعامعا دا، مەملەكەتكە دە وتە پايدالى ءىس»، – دەدى.

جوبانىڭ وتكەن جىلعى كورسەتكىشتەرىنە كوز جۇگىرتەر بولساق، ۇبت-عا قاتىسپاعان جانە شەكتى دەڭگەيدى جيناي الماعان مەكتەپ تۇلەكتەرىنىڭ جالپى سانى 54172 جاستى قۇرادى. قايتا تەستىلەۋدىڭ ارقاسىندا 13514 تۇلەك قازاقستاندىق جانە 5820 تۇلەك شەتەلدىك ءبىلىم بەرۋ ورىندارىنا وقۋعا وقۋعا ءتۇستى. سونداي-اق، 22526 تۇلەك كاسىپتىك جانە تەحنيكالىق ءبىلىم بەرۋ ۇيىمدارىنا جانە دايارلاۋ كۋرستارىنا تۇسسە، 1006 جاس اسكەر قاتارىنا شاقىرىلعان. ال 1408 تۇلەك ءوز كۇشتەرىمەن جۇمىسقا ورنالاستى. بيىل دا باس پارتيانىڭ قولداۋىمەن سىناقتان سۇرىنگەن جاستارىمىز ءومىردىڭ ءبىر كەتىگىنە كىرپىش بولىپ قالانادى دەگەن سەنىمىمىز مول.