بۇگىن ق ر پرەزيدەنتى نۇرسۇلتان نازاربايەۆ ەلىمىزدەگى ەڭ ۇلكەن تۋدىڭ تۇبىندە وتكەن مەرەكەلىك شاراعا قاتىسىپ، استانا كۇنىنە ارنالعان مەرەكەلىك شارالاردىڭ باستالعانىن رەسمي تۇردە جاريالادى، دەپ xابارلايدى قامشى اقپاراتتىق اگەنتتىگى قازاقپارات مالىمەتىنە سۇيەنىپ.

"بيىل سۇيىكتى استانامىزعا 19 جىل تولىپ وتىر. بۇل بارشا قازاقستاندىقتارعا ورتاق مەرەكە. ءبىز - باقىتتى ۇرپاقپىز. سەبەبى اتا-بابالارىمىز كورگەن سۇراپىل سوعىس پەن اشتىقتىڭ زاردابىن تارتقان جوقپىز. قازىرگى ءومىرىمىز وسى قالپىندا بولدى دەپ ويلايمىز. ولاي ەمەس. بۇگىنگى ۇرپاق اتا-بابالارىمىزدىڭ ارقاسىندا وسى كۇنگە جەتىپ وتىر. ءبىزدىڭ ەندىگى ماقساتىمىز - وسى بىرلىك-بەرەكەنى ساقتاۋ، جەڭىسكە جەتۋ. باسەكەلەستىككە توتەپ بەرىپ، تەك جەڭىسكە عانا جەتۋىمىز كەرەك. سونىڭ ارقاسىندا العا قويعان ماقساتتارعا جەتىپ، قابىلداعان باعدارلامالاردى ىسكە اسىرا الامىز"، - دەدى نۇرسۇلتان نازاربايەۆ.

مەملەكەت باسشىسى xالىقتىڭ بىرلىگى بولماي، ەشبىر باعدارلامانى ىسكە اسىرا المايتىنىمىزدى جەتكىزدى. ال بىرلىك-ىنتىماق بولسا، قازاقستاندى بۇدان دا جوعارى دەڭگەيگە كوتەرىپ، الەم قاۋىمداستىعىنىڭ قۇرمەتىنە بولەنۋگە مۇمكىندىك بار.

ايتا كەتەيىك، بۇگىنگى شارا بارىسىندا پرەزيدەنت تۋدى قالاي تاڭداعانىن ەسكە الدى.

شولۋشى: ايگەرىم تاۋباي