قازاقستاننىڭ 18 ميلليونىنشى تۇرعىنى دۇنيەگە كەلدى. 18 ميلليونىنشى تۇرعىن وسى جىلدىڭ 11 مامىرىندا دۇنيەگە كەلدى دەپ حابارلايدى قامشى اقپاراتتىق اگەنتتىگى  ق ر ۇەم باسپا ءسوز قىزمەتىنە سىلتەمە جاساپ.

ۇلتتىق ەكونوميكا ءمينيسترى تيمۋر سۇلەيمەنوۆتىڭ ايتۋىنشا، «ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەكتەرى بويىنشا 2017 جىلعى مامىردا قازاقستان حالقىنىڭ سانى 18 ميلليون ادامعا جەتتى، ال 18 ميلليونىنشى تۇرعىننىڭ تۋعان كۇنى 2017 جىلدىڭ 11 مامىرىنا ساي كەلدى.

18 ميلليونىنشى تۇرعىننىڭ تۋعان كۇنىن انىقتاۋ بارلىق دەموگرافيالىق وقيعالاردى: حالقى سانىنىڭ ءوسىم (تۋۋ جانە يمميگراسيا) جانە تومەندەۋ (ءولىم جانە ەميگراسيا) كومپونەنتتەرىن ەسكەرە وتىرىپ جاسالدى. كوميتەت 18 ميلليونىنشى تۇرعىندى احات ورگاندارى 2017 جىلعى 11 مامىردا تىركەگەن تۋۋ تۋرالى اكت جازبالارى مالىمەتتەرى نەگىزىندە قالىپتاستىرىلعان تۋعان كۇندەر بازاسىنداعى بالالاردى ىزدەۋ جولىمەن انىقتادى. كانديداتۋرا ولاردىڭ انالارىنىڭ تۇرعىلىقتى جەرىنە (قالالىق/اۋىلدىق جەر)، ولاردىڭ ءبىلىم دەڭگەيى مەن كاسىپتەر تۇرىنە، سونداي-اق جاڭا تۋعان نارەستەلەردىڭ جىنىسى، سالماعى مەن بويىنا قاراماستان، تۇتاستاي العاندا رەسپۋبليكا بويىنشا انىقتالدى.

18 ميلليونىنشى تۇرعىن  الماتى وبلىسى تالدىقورعان قالاسىندا تۋعان. ەسىمى  مۋسليما سامات قىزى. مۋسليما وتباسىنداعى ەكىنشى نارەستە. تۋعان كەزدە نارەستەنىڭ سالماعى 3300 گرامم، ال بويى 51 سم بولدى. نارەستەنىڭ اتا-اناسى تالدىقورعان قالاسىندا تۇرادى: اناسى – ومارحانوۆا ديانا ەريك قىزى – دەفەكتولوگ، 1991 جىلى تۋعان، اكەسى – بەستىبايەۆ سامات ەركينبەك ۇلى – ءمۇعالىم، 1982 جىلى تۋعان.

جالپى، تاۋەلسىزدىك جىلدارى ىشىندە حالىق سانى 1 562،5 مىڭ ادامعا نەمەسە 9،5%-عا ءوسىپ، وسى جىلدىڭ 1 ماۋسىمىندا 18 014،2 مىڭ ادامدى قۇرادى.

1991 جىلىمەن سالىستىرعاندا تۋعاندار سانى 353،2-دەن 400،7 مىڭ ادامعا نەمەسە 13،5%-عا ءوستى.

قاراستىرىلىپ وتىرعان كەزەڭدە قايتىس بولعاندار سانى 2،3%-عا ازايىپ، 2016 جىلى 131،2 مىڭ ادامدى قۇرادى.

ءولىم-جىتىمنىڭ جالپى كوەففيسيەنتى 1000 ادامعا شاققاندا 1991 جىلعى 8،2-دان 2016 جىلعى 7،4 قايتىس بولعاندارعا تومەندەدى. نارەستە ءولىم-جىتىمى جاڭا تۋعان 1000 نارەستەگە شاققاندا 1991 جىلعى 27،3-تەن 2016 جىلى 8،6-عا دەيىن ازايدى.

حالىقتىڭ ءومىر ءسۇرۋ ۇزاقتىعى 1991 جىلمەن سالىستىرعاندا 4،7 جىلعا، ونىڭ ىشىندە ەرلەردە – 5،3، ايەلدەردە 4،5 جىلعا ءوستى. 2016 جىلى ءومىر ءسۇرۋ ۇزاقتىعى 72،3، ەرلەردە – 67،9، ايەلدەردە – 76،9 جىلدى قۇرادى.

شولۋشى: ايگەرىم تاۋباي