2017 جىلدىڭ 10-18 شىلدەسى ارالىعىندا شاڭعى جارىسىمەن اينالىساتىن 12-16 جاستاعى 60 بالا «الاتاۋ» شاڭعى-بياتلوندىق كەشەنىندە ورنالاسقان جازعى سپورتتىق-ساۋىقتىرۋ لاگەرىنە بارماق دەپ حابارلايدى قامشى اقپاراتتىق اگەنتتىگى.

اتالعان لاگەر ىلە الاتاۋى جوتاسىنىڭ بەتكەيىنەن 1500 مەتر بيىكتىكتەگى بىرەگەي جەردە، تالعار قالاسىندا ورىن تەپكەن. جاس سپورتشىلار ەلىمىزدىڭ اتاقتى شاڭعىشىلارىنىڭ شەبەرلىك ساباعىنا قاتىسىپ، سپورتتىق داعدىلارىن جەتىلدىرمەك.

بالالارعا ارنالعان جازعى لاگەردىڭ ۇيىمداستىرۋشىسى «قازاقستان رەسپۋبليكاسى شاڭعى جارىسىنىڭ ۇلتتىق فەدەراسياسى» قب كەلۋشى قوناقتارىنا ارناپ قىزىقتى ءارى تارتىمدى باعدارلاما ازىرلەدى.

لاگەردىڭ سپورتتىق باعدارلاماسى ءتۇرلى جاتتىعۋلار، تيمبيلدينگتەر، ءجۇزۋ، ۆولەيبول مەن ۇستەل تەننيسىنەن دوستىق جارىستاردى جانە شاڭعى روللەرلەرىندەگى كوماندالىق سايىستاردى قامتىعان.

سپورتتىق شارالاردان وزگە بالالار اتپەن سەرۋەندەۋ مۇمكىندىگىنە يە بولىپ، ۆلاديمير سميرنوۆ پەن اناتوليي بۋكرەيەۆ سىندى قازاقستاندىق تانىمال شاڭعىشىلار تۋرالى فيلمدەردى تاماشالاي الادى. سونداي-اق، مادەني باعدارلامادا كونسەرتتەر مەن بي كەشتەرىن وتكىزۋ قارالعان.