قازاقستان پرەزيدەنتى نۇرسۇلتان نازاربايەۆ قانداي دا ءبىر نىساندى ءوز ەسىمىمەن اتاۋعا قارسى ەكەنىن ايتتى، دەپ جازادى قامشى اقپارات اگەنتتىگى.

ەلباسى بۇل تۋرالى «روسسيا 24» ارناسىنا بەرگەن سۇحباتىندا حالىقارالىق اۋەجايدى «نۇرسۇلتان نازاربايەۆ» دەپ وزگەرتۋ تۋراسىندا اڭگىمە بولعاندا ءمالىم ەتتى.

«بۇل مەنىڭ باستامام ەمەس. مەن وندايعا قارسىمىن. ءدال وسى ماسەلە الدىمنان قايتا-قايتا شىعادى. ادامدار اتقارىلىپ جاتقان جۇمىستى كورىپ، مەنى باعالايتىن شىعار، ول ءۇشىن قۋانامىن. دەگەنمەن ءار ساياساتكەر، ءار مەملەكەت باسشىسى ءوز ىسىمەن ەل ەسىندە ساقتالۋى ءتيىس»، - دەدى ەلباسى.

سونداي-اق، ريم يمپەراتورى، فيلوسوف مارك اۆرەليانىڭ ايتاقاندارىن ەسىنە ءتۇسىردى: «يمپەراتوردان «نەگە سەنىڭ ەسكەرتكىشىڭ جوق» دەپ سۇراعاندا، حالىقتىڭ كەيىن «بۇل كىمنىڭ ەسكەرتكىشى» دەپ سۇراعانىن قالايمىن دەپ جاۋاپ بەرگەن. مەنەن كەيىن حالىق «وعان نەگە ءالى ەسكەرتكىش قويىلماعان» دەپ سۇراۋى كەرەك»، - دەدى.

ايتا كەتەيىك، 21 ماۋسىم كۇنى استانا اۋەجايى «نۇرسۇلتان نازاربايەۆ حالىقارالىق اۋەجايى» دەپ اتالدى.  اقپارات جانە كوممۋنيكاسيا ءمينيسترى داۋرەن ابايەۆ نۇرسۇلتان نازاربايەۆتىڭ اتالمىش شەشىمدى قالاي قابىلداۋى مۇمكىن ەكەنىن ايتقان.

«مەملەكەت باسشىسى بۇل جولى تۇسىنىستىك تانىتىپ، قولدايدى دەپ ۇمىتتەنەمىن. بۇل وتە ماڭىزدى. سەبەبى، «نۇرلى جول» اياسىندا جاسالعان جۇمىستى حالىق ءتۇسىنۋى كەرەك»، - دەدى مينيستر.

رەسەيلىك «روسسيا-24» ارناسى الەمدەگى ەڭ جاس استانا – استانا قالاسى جايىندا «قازاقستان بولاشاققا قارايدى» دەپ اتالاتىن ارنايى رەپورتاجىن تۇسىرگەن. سۇحبات بارسىنىدا ەلباسى استانانى سالۋ تاريحى جونىندەگى سۇراقتارعا جاۋاپ بەرىپ، قازاقستان ەلورداسىنىڭ توڭىرەگىندەگى جاسىل ايماقتى دامىتۋ بارىسىن اڭگىمەلەدى.

سونداي-اق، نۇرسۇلتان نازاربايەۆ رەسەيلىك تەلەارنا تىلشىسىنە ەلىمىزدىڭ بىتىمگەرشىلىك ميسسياسىنىڭ ماقساتتارىنا، الەمدەگى قاقتىعىستاردى رەتتەۋ جونىندەگى قازاقستان قىزمەتىنىڭ ناتيجەلەرىنە توقتالدى. بۇدان بولەك، قازاقستان پرەزيدەنتى ەل ەكونوميكاسىن جاڭعىرتۋ ۇدەرىسى جانە يندۋستريالىق-ينفراقۇرىلىمدىق دامۋ باعدارلاماسىن ىسكە اسىرۋ ناتيجەلەرى تۋرالى ايتىپ بەردى.

شولۋشى: گۇلىم جاقان