اعىلشىننىڭ Times گازەتىنە سۇحبات بەرگەن كاتار قارجى ءمينيسترى Ali Sharif Al Emadi كاتاردىڭ قورقىتىلمايتىن وتە باي ەل ەكەنىن ايتقان. بۇل تۋرالى BBC تۇرىك قىزمەتى جازدى.

ساۋد ارابيا، مىسىر، باحرەين، ءباا سياقتى ەلدەر «تەرروريزمگە قولداۋ جاسادى» دەپ ايىپتاپ، كاتارعا وتكەن ايدان ەمبارگو قويعان ەدى.  Al Emadi ونداعان جىلدار بويى تابيعي گاز ساتۋدان تۇسكەن قارجى قورىنىڭ اسا باي ەكەنىن ايتقان.

Al Emadi: «جالپى ىشكى ءونىمى — %250 – عا تەڭ كەلەتىن حالىقارالىق كاپيتال قورىنا يەلىك ەتەمىز. كاتار ورتالىق بانكى رەزەرۆىمىز بار. قارجى مينيسترلىگىنىڭ دە ستراتەگيالىق قورلارى بار»، - دەپ  ەلدىڭ ەكونوميكالىق قۋاتتىلىعى تۋرالى ەگجەي-تەگجەيلى ايتقان. ول سونداي-اق ءوز ەلىنىڭ ەكونوميكاسىنا، دوھاعا ەمبارگو قويعان ەلدەردىڭ ەكونوميكاسىن سالىستىرا كەلىپ، وزدەرىنىڭ قارجىلىق نەگىزى الدەقايدا كۇشتى ەكەنىنە نازار اۋدارتقان.

Al Emadi ءوز سوزىندە اتالعان ەلدەردىڭ ءتىپتى ايتارلىقتاي ەكونوميكالىق قيىندىقتارى بار ەكەنىن جەتكىزگەن. «باحرەين مەن مىسىردىڭ كرەديتتىك سكورينگى قوقىس دەڭگەيىندە. ساۋد ارابياسىنا قاراساڭىز قارجىلىق جاعدايىنىڭ قيىن ەكەنىن اڭعاراسىز. ايماقتاعى ەڭ قارقىندى دامىعان ەل ءبىزدىڭ ەلىمىز. وزىمىزگە ەڭ جاقىن پارسى شىعاناعى ەلدەرىنىڭ ىنتىماقتاستىق كەڭەسىندەگى اراب امىرلىكتەرىنەن 40 پايىزعا تەز دامىپ كەلەمىز»، - دەگەن مينيستر.

ەسكە سالا كەتەر بولساق، وتكەن ايدا جوعارىدا اتالعان ءتورت اراب ەلى «تەرروريزمدى» قولدادى دەپ ايىپتاپ، كاتارعا ەمبارگو قويعان. ەكى اپتا بۇرىن اتالعان ەلدەر ەمبارگونىڭ كۇشىن جويۋ شارتى رەتىندە 13 باپتان تۇراتىن تالاپ ءتىزىمىن جاريالاعان. تالاپتىڭ اراسىندا كاتارداعى تۇرىك بازاسىنىڭ جابىلىبۋى،  ءال-جازيرا تەلەارناسىنىڭ ەفيرىن توقتاتۋ، يرانمەن قاتىناسىن السىرەتۋ، يەمەندەگى بۇلىكشىلەردى قولداۋدى توقتاتۋ سياقتى شارتتار بار.  

دوھا بۇل تالاپتاردىڭ نەگىزسىز ەكەنىن، وزدەرىنىڭ قالىپتى قارىم-قاتىناس ورناتۋ ءۇشىن ديالوگقا ءازىر ەكەنىن ايتقان. ايتا كەتسەك، اتالعان جاعداي سوڭعى 20 جىلدا شىعاناقتا ورىن العان ەڭ ۇلكەن جاعداي بولىپ وتىر.