الاكول كولى الماتى وبلىسى سۋعا كەتكەن الاكولدەگى شومىلۋ ماۋسىمىنىڭ باستالعانىنا ەكى اپتا ءوتتى. قۇتقارۋشىلار وسى ۋاقىت ىشىندە سۋعا كەتىپ بارا جاتقان 7 ادامدى قۇتقارىپ العان دەپ حابارلايدى 24.kz. الماتى وبلىستىق توتەنشە جاعدايلار دەپارتامەنتىنىڭ جەدەل قۇتقارۋ جاساعى كول جاعاسىندا دەمالۋشىلار اراسىندا ءتۇسىندىرۋ جۇمىستارىن جۇرگىزدى. ادەتتەگىدەي شومىلۋ ماۋسىمى باستالار-باستالماستان-اق قۇتقارۋشىلاردىڭ دا جۇمىسى قىزا تۇسەدى. الاكول جاعاسىندا ورنالاسقان الماتى وبلىستىق توتەنشە جاعدايلار دەپارتامەنتىنىڭ جەدەل قۇتقارۋ جاساعى قاجەتتى تەحنيكا، قۇرال-سايماندارمەن تولىق قامتاماسىز ەتىلگەن.

مۇنداعى سۇڭگۋىرلەر 20-25 مەتر تەرەڭدىكتە جۇمىس ىستەي الادى. مارات سماعۇلوۆ، الاكول قۇتقارۋ بولىمشەسىنىڭ جەتەكشىسى: - 13 ادام جۇمىس جاسايدى. سونىڭ ىشىندە مەدبيكەمىز بار. قالعان 12ء-سى سۇڭگۋىر-قۇتقارۋشىلار. دەمالۋشىلار جىلدان-جىلعا بايىپ كەلە جاتىر. دەمالىس ورىندارى كوبەيىپ بارا جاتىر. سۋى دەرتكە داۋا، جانعا شيپا بولعان الاكولدىڭ جاعاسىنا وتكەن جىلى 500 مىڭنان استام ساياحاتشى كەلگەن. ون ەكى ادامنان تۇراتىن قۇتقارۋشىلار جاساعى، ارينە، ازدىق ەتەدى. «سوندىقتان سۋ پوليسياسىن قۇرىپ، كول جاعاسىندا كورسەتىلەتىن قىزمەت ساپاسىن دا بارىنشا جاقسارتۋ كەرەك، – دەيدى دەمالۋشىلار.  
ازىرگە سوڭى قايعىلى جاعدايعا اكەلىپ سوقتىرعان وقيعالار بولا قويعان جوق. دەگەنمەن سۋ جاعاسىندا قاۋىپسىزدىك ەرەجەلەرىن قاتاڭ ساقتاعان ابزال. ول ءۇشىن دەمالۋشىلارعا قاۋىپسىزدىك ەرەجەلەرى جازىلعان ءۇنپاراقتار تاراتىلىپ، ادامداردىڭ سۋدا ءوز-وزىن قالاي ۇستاۋى كەرەكتىگى جان-جاقتى ءتۇسىندىرىلىپ جاتىر.