قازاقيادا ەلى ءۇمىت ارتىپ، ۇكىمەت جاعالاعان اق جاعالىلاردىڭ بەيبىت زاماندا «رەپرەسسياعا» ۇشىراۋى تىم جيىلەپ كەتتى. جاڭبىر جاۋماي سۋ بولدى دەۋگە نەگىز جوق. جەل تۇرماسا ءشور باسى قيمىلداماس دەيتىنىمىز تاعى بار. ءوزى قالاعان ادامى كوزىنشە قىلمىس جاساعاسىن «حالىق تاڭداۋىنا» دا تاڭدانىسپەن قارايسىڭ. جۇرت كوڭىلىندە جوعارى قىزمەتتەگىلەردىڭ جاعدايى جاقسى بولۋعا ءتيىس. اسىرەسە، زاڭ سالاسىنداعى لاۋازىمدى تۇلعالاردىڭ اسىعى الشىسىنان. بۇل قالىڭ بۇقارانىڭ ويى. ارينە، جالعىز جالاقىنىڭ جانباعىسقا جاردەمى بولماسا، قوس قاباتتى ءۇيدىڭ قابىرعاسىن قالاۋعا قىسقالىق قىلاتىنى بار. سوعان قاراماستان كوپ كولىكتىلەر مەن كوپ قاباتتىلار قاتارى كەمىگەن جوق. قاي جولمەن كىرپىشى قالانسا دا «پىسىقتىعىنا» جاماي سالدىق. سويتە كەلە، سىرىن تاني «جەمقورلىققا» دا تۇسىنىستىكپەن قاراي باستادىق. بۇل ءۇردىستىڭ تىڭ باستاما ەمەس ەكەنى ءمالىم. باياعى بارىمتا زامانى مەن بي اۋزىن باققان ءداۋىردىڭ ءوز قالىبىنا ساي «جەمقورلىق» جولى بولدى. كىم مالدى بولسا، سول زاڭدى. بابا جولىن بالاسىنا ۇيرەتپەسە دە، بالاق تومەن بىلىقتاردى ءتىرىلتۋشى بۇگىنگى بيلىك باسىنداعى «كەي» كىسلەر. وكىنىشتىسى سول «كەيلەردىڭ» قاتارى كۇن ساناپ كەمۋدىڭ ورنىنا كەمەلدەنىپ كەلەدى. كەشە عانا لاۋازىم تايلاعىن جەتەكتەگەن سەرىك احمەتوۆ مىرزانىڭ بۇگىن تايقارعا تەرىس مىنگەن ءتۇرىن كورىپ وتىرمىز. اتىشۋلى اعالارىمىزدىڭ ارتى دا شۋلى بولدى. سەرىك احمەتوۆ اسا ءىرى كولەمدەگى مەملەكەت قارجىسىن جىمقىردى دەگەن ايىپ تاعىلىپ وتىر. قىلمىستىق كودەكستىڭ 176-بابىنىڭ 4-بولىگى، ب تارماعىندا قاراستىرىلاتىن اۋىر جەمقورلىق قىلمىسىن (جاۋاپتى مەملەكەتتىك لاۋازىمداعى ادامنىڭ بيۋدجەت قاراجاتىن اسا ءىرى كولەمدە جىمقىرۋى) جاسادى دەپ ايىپتاعان. بيىلعى 2014 جىلدىڭ وزىندە مىنانداي لاۋازىمعا تۇلعالاردىڭ ۇستىنەن قىلمىستىق ءىس قوزعالعان.
- باعدات مايكەيەۆ
گەنارال-مايور اسا ءىرى كولەمدە «پارا» الۋ بارىسىندا قولعا تۇسكەن. 2 000 000 اقش دولللارى. 6 جىل باس بوستاندىعىنان ايىرىلدى.
- باۋىرجان ابدىشيەۆ
قاراعاندى وبلىسىنىڭ بۇرىنعى اكىمى. اتالمىش لاۋازىمدى ءبىر جىلداي اتقارعان. ءوز قىزمەتىن اسىرا پايدالانىپ جەر بولىنىسىندە قىلمىسقا بارعان.
- مۇرات وسپانوۆ
ق ر تابيعي مونوپوليا باقىلاۋ اگەنتتىگىنىڭ بۇرىنعى باسشىسى. 20 0000 اقش دولللارى كولەمىندە پارا العان.
- ەرلان ارىن
پاۆلودار وبلىسىنىڭ بۇرىنعى اكىمى. اسا ءىرى كولەمىندە پارا الدى جانە پاۆلودار قالاسىنداعى كوپقاباتتى ۇيلەرگە بولىنگەن قاراجاتتى جىمقىرعان دەگەن ايىپ تاعىلعان.
- ءمۇسلىم ومىرايەۆ
مەملەكەتتىك تاپسىرىسقا قاتىستى ىستە 100 000 اقش دوللارى كولەمىندە پارا العان.
- مەيرام سىماعۇلوۆ
قاراعاندىنىڭ بۇرىنعى باسشىسى. قالاداعى كوپقاباتتى ۇيلەرگە جوندەۋ جۇمىستارىن جۇرگىزگەن «يۋتەكس» مەردىگەر كومپانياسىنا ءوز قوراجايىن تەگىن جوندەۋگە ماجبۇرلەگەن. كومپانيا 5 ميللون تەڭگەگە شىعىنعا باتقان.
- سەرىك اشىمبايەۆ
ق ر ۇقك-نىڭ شەكارا ءبولىمىنىڭ بۇرىنعى باستىعى. 300 ميلليون تەڭگە كولەمىندە پارا الدى دەگەن ايىپپەن ۇستالدى.
- سەرىك احمەتوۆ
كۇنى كەشەگى پرەمەر مينيستر. اسا ءىرى كولەمدە پارا الدى دەگەن ايىپپەن ءۇي قاماقتا وتىر. ىعاي مەن سىعايلار. ءبىرىنىڭ بەدەلى بەرەكەسىز ەمەس.
مىنە، وسىلار ەلىن سۇيگەن، ەلى سۇيگەن ەلباسىنىڭ ەلدى سەنىپ تاپسىرعان ادامدارى. حالىقتى قامىن جەيمىن دەپ وتىرعانداعى ورنىندا «جەيمىننىڭ» عانا جوسپارىن جوعارى دارەجەدە ورىنداپ شىقتى. سەرىكتەردىڭ ساپاسى سەتىنەي باستادى. سەنەرىمىز كىم؟ ازىرگە ۇزدىك 8-دىك وسىلار.. زاڭنىڭ كۇشەيگەنى مە جوق تۇرمەدەگى جاعدايدىڭ جاقسارعانى ما لاۋازىمدىلار لاۋ جەگىپ لەك-لەگىمەن كەتىپ جاتىر...
كىمگە سەنەمىز؟
ورىنباسار باقىتبەك
