21 قاراشا. استانا قالاسىندا ايگىلى جازۋشى قاجىقۇمار شابدان ۇلىنىڭ شىعارماشىلىعىن زەردەلەۋگە ارنالعان دوڭگەلەك ۇستەل ءوتتى.

بۇرالاڭ تاعدىرىنا قاراماي، قولىنان قالامىن تاستاماعان قايسار جازۋشى، قازاق ادەبيەتىندەگى تۇڭعىش التى تومدىق روماننىڭ اۆتورى قاجىعۇمار شابدان ۇلىنىڭ ارتىنا قالدىرعان باي مۇرالارىن زەرتتەپ، تۋعان حالقىنا ناسيحاتتاۋدى مۇرات تۇتقان «قاجىعۇمار قازىناسى حالقىنا تولىق جەتكەن جوق» اتتى ساليحالى باسقوسۋدى «ۇلت بىرلىگى» قوعامدىق قورىنىڭ ۇيىمداستىردى.

باسقوسۋعا بەلگىلى قوعام قايراتكەرى، اقىن نەسىپبەك ايت ۇلى، تاريح عىلىمدارىنىڭ دوكتورى تۇرسىنحان زاكەن ۇلى، «ۇلت بىرلىگى» قوعامدىق قورىنىڭ پرەزيدەنتى باۋىرجان شاقاربەك ۇلى ادەبيەتتانۋشى عالىمدار مەن تاريحشىلار، جازۋشىنىڭ ۇرپاقتارى، سونداي-اق ب ا ق وكىلدەرى قاتىستى.

جيىندا ءسوز العان جازۋشى، زەرتتەرمەندەر داڭقتى جازۋشىنىڭ عۇمىر بەلەستەرىنەن سىر شەرتىپ، جازۋشى شىعارمالارىن ناسيحاتتاۋدىڭ ماڭىزدىلىعىنا توقتالدى. سونىمەن قاتار، الدىمىزداعى جىلى اتاپ وتىلەتىن جازۋشىنىڭ 90 جىلدىعىن ءساتتى ۇيىمداستىرۋ جايى دا ءسوز بولدى.

ارقا توسىندەگى جينالىسقا الماتىدان ارنايى كەلگەن جاينار قاجىعۇمار قىزى اكەسى جايلى اسەرلى اڭگىمە ءوربىتىپ، جازۋشىنىڭ ءبىر تومدىق قولجازباسى ءالى كۇنگە ەش جەردە جاريالانباعانىن جەتكىزدى.

شارا سوڭىندا «ورنەك» باسپاسىنان شىققان قاجىقۇمار شابدان ۇلىنىڭ ايگىلى شىعارماسى «قىلمىس» رومانىنىڭ توتە جازۋداعى نۇسقاسىنىڭ تۇساۋى كەسىلىپ، وقىرمان قاۋىمعا جول تارتتى.

ورازبەك ساپارحان