10-جەلتوقسان كۇنى تاۋەلسىزدىك كۇنى قارساڭىندا الماتىداعى رەسپۋبليكا سارايىندا كەشكى ساعات 19.00-دە قازاق ەستراداسىنىڭ ماەستروسى، سازگەر، قازاقستاننىڭ ەڭبەك سىڭىرگەن قايراتكەرى، ا.جۇبانوۆ اتىنداعى دارىندى بالالارعا ارنالعان رەسپۋبليكا¬لىق قازاق مامانداندىرىلعان مۋزىكا مەكتەپ-ينتەرناتىنىڭ ەسترادالىق-سيمفونيالىق وركەسترىنىڭ كوركەمدىك جەتەكشىسى، ديريجەر، ارانجيروۆكا شەبەرى نۇرلان بايكوزوۆتىڭ جەكە شىعارماشىلىق كەشى وتەدى. كەشكە جۇبانىش جەكسەن ۇلى، ماقپال ءجۇنىسوۆا، باعدات سامەدينوۆا، مارجان اراپبايەۆا، م.ارىنبايەۆ، د.سەيىتجانوۆ، سايا ماحانبەت قىزى، ە.ابىشيەۆ، «جەتىگەن»، «ميۋزيكولا» توپتارىمەن قاتار وزگە دە ونەر جۇلدىزدارى قاتىسادى. كونسەرتتەن تۇسكەن قارجىنىڭ ءبارى قايرىمدىلىق ماقساتتا جۇمسالماق. نۇرلان بايكوزوۆتىڭ ونەردەگى نەگىزگى قادامدارى ستۋدەنتتىك كۇندەرى باستالعان. 1973 جىلى شىمكەنت مۋزىكالىق ۋچيليششەسىندە ءجۇرىپ، «ستەپنىە ماكي» (قىر قىزعالداقتارى) دەپ اتالاتىن ۆوكالدىق-اسپاپتى انسامبل قۇرادى. ارادا ءبىر جىل وتكەندە ۆيا «ستەپنىە ماكي» ماسكەۋدە وتكەن بايقاۋدا جەڭىمپاز اتانادى. قازاقتىڭ سيرك ونەرىن تۇڭعىش رەت اۋەنمەن ورنەكتەگەن سازگەر بۇگىندە ا.جۇبانوۆ اتىنداعى دارىندى بالالارعا ارنالعان رەسپۋبليكا¬لىق قازاق مامانداندىرىلعان مۋزىكا مەكتەپ-ينتەرناتىندا ەسترادالىق-سيمفونيالىق وركەستر قۇرىپ، ونىڭ كوركەمدىك جەتەكشىسى قىزمەتىن اتقارۋدا.

قازاقستان كومپوزيتورلار وداعىنىڭ مۇشەسى نۇرلان بايكوزوۆ حالىقتىڭ جۇرەگىنەن ورىن العان تالاي ءاننىڭ اۆتورى رەتىندە تانىمال. بۇگىندە اندەرىنىڭ سانى 60-تان اسقان. حالىق ونى ماقپال ءجۇنىسوۆانىڭ ورىنداۋىنداعى «دەمە سەن» انىمەن جاقسى تانيدى، سونىمەن قاتار باعدات سامەدينوۆا، قۇدايبەرگەن بەكىشوۆ، ەرالحان ءابىشوۆ سىندى ونەر يەلەرى بۇگىندە بايكوزوۆتىڭ اندەرىن ورىنداپ، كورەرمەنگە ۇسىنىپ ءجۇر. بۇدان بولەك، 50-دەن استام سيمفونيالىق وركەسترگە جانە ەسترادالىق سيمفونيا وركەسترلەرىنە، انسامبلدەرگە ارنالعان شىعارمالارى بار. ونىڭ كوپشىلىگى ەۋروپا ەلدەرىنىڭ ساحناسىندا ورىندالعان.

«شىعارماشىلىق كەشىمدى تاۋەلسىزدىك كۇنىنە ورايلاستىرعاندى ءجون كوردىم. تاۋەلسىزدىك – ءبىزدىڭ ەڭ باستى ارمانىمىز بولىپ كەلدى. دەمەك، ونى قادىرلەۋ، باعاسىن ءبىلۋ ءبارىمىزدىڭ پارىزىمىز بولۋى كەرەك دەپ سانايمىن»، - دەيدى سازگەر.

انىقتاما 1979-1984جج. «گۇلدەر » ءانسامبىلىنىڭ باس ديريجەرى بولدى. 1984-1988 جج. «دوس مۇقاسان» ءانسامبلىنىڭ مۋزىكالىق جەتەكشىسى. 1988-1992 جج. «نازەركە» ءانسامبلىنىڭ كوركەمدىك جەتەكشىسى. 1992-2010 جج. الماتى مەملەكەتتىك سيرك وركەسترىنىڭ باس ديريجەرى. 2005-2012 جج. الماتى كالاسى اكىمىنىڭ ەسترادا-سيمفونيالىق وركەسترىنىڭ كوركەمدىك جەتەكشىسى جانە باس ديريجەرى قىزمەتتەرىن اتقارعان.