بۇگىن قازاقستان رەسپۋبليكاسى ۇلتتىق مۋزەيىندە «قاسيەتتى قازاقستان» ولكەتانۋدى دامىتۋ ورتالىعىنىڭ عىلىمي-ساراپتامالىق كەڭەسىنىڭ وتىرىسى ءوتتى.  وتىرىستا جالپى ۇلتتىق دەڭگەيدەگى 100 نىساندى بەلگىلەۋ جانە تىزىمدەۋ جوباسى بەكىتىلدى-دەپ حابارالايدى مادەنيەت جانە سپورت مينيسترىلگىنىڭ باسپا ءسوز قىزمەتى.

ءبىز بۇگىن قوعامدىق سانانى جاڭعىرتۋ باعدارلاماسىن ىسكە اسىرۋ جونىندە جانە ەلىمىزدىڭ كيەلى جەرلەرىنىڭ گەوگرافياسى اياسىندا قۇرىلعان «قاسيەتتى قازاقستان» عىلىمي-زەرتتەۋ ورتالىعىنىڭ اتقارىلعان جۇمىستارى، قولعا الىنعان شارۋالارى مەن جالپى جوسپارىنا توقتالىپ، تۋىنداعان وزەكتى ماسەلەلەردىڭ ورتاق شەشىمىن تابۋ ءۇشىن باس قوسىپ وتىرمىز.

«قازاقستاننىڭ كيەلى جەرلەرىنىڭ جالپىۇلتتىق دەڭگەيدەگى نىسانداردى»  بەلگىلەۋ ماقساتىنداعى عىلىمي-ساراپتامالىق كەڭەسى وتىرىسىندا، «قازاقستاننىڭ كيەلى جەرلەرىنىڭ گەوگرافياسى» جوباسىن ازىرلەۋ بارىسىندا قولعا الىنعان ىستەر تالقىلاندى. قالالاردا جانە وبلىس اكىمدىكتەرى وكىمدەرىمەن جۇمىس توپتارى قۇرىلىپ، ونىڭ قۇرامىنا بەلگىلى تاريحشى عالىمدار، ولكەتانۋشىلار ەنگەنى ايتىلدى. 

وسىعان بايلانىستى ىرىكتەلىپ الىناتىن نىساندار ماكروساكرالدى جانە ميكروساكرالدى بولىپ ەكىگە ءبولىندى. قاسيەتتى نىساندار مىناداي كريتەرييلەرگە سۇيەنە ءبولىنىپ وتىر: تابيعي-لاندشافتى نىساندار؛ ارحەولوگيالىق جانە ساۋلەت ەسكەرتكىشتەرى؛ عيبادات ورىندارى سانالاتىن ءدىني نىساندار جانە تاريحي تۇلعالارمەن، ساياسي وقيعالارمەن بايلانىستى ورىندار.

عىلىمي-ساراپتامالىق كەڭەس قۇرامىنا بەلگىلى تاريحشىلار، قوعام قايراتكەرلەرى، قولونەر شەبەرلەرى كىرەدى. ولاردىڭ قاتارىندا ب. ءابدىعالي ۇلى، ح. ابجەنوۆ، ن. ءالىمباي ر. تۇرسىنزادا سىندى تاعى دا باسقا ەلگە ەسىمدەرى بەلگىلى تۇلعالار بار.