كەشە اقوردادا مەملەكەتتىك حاتشى مۇحتار قۇل-مۇحاممەدتىڭ ءتوراعالىق ەتۋىمەن قازاقستان رەسپۋبليكاسى پرەزيدەنتى جانىنداعى ازاماتتىق ماسەلەلەر جونىندەگى كوميسسيانىڭ كەزەكتى وتىرىسى بولىپ ءوتتى.
وتىرىستى قىسقاشا ءسوز ءسويلەپ اشقان مۇحتار قۇل-مۇحاممەد كۇن تارتىبىنە ءۇش ماسەلەنىڭ ۇسىنىلاتىنىن ايتتى. ولاردىڭ ءبىرىنشىسى ءبىر توپ شەتەلدىكتىڭ قازاقستان ازاماتتىعىن الۋ ءجونىندەگى وتىنىشتەرىن تالقىلاۋعا ارنالسا، ەكىنشىسى ەلىمىز ازاماتتىعىنان شىعاتىنداردىڭ تىلەگىنە بايلانىستى. ال ءۇشىنشى ماسەلە بويىنشا كوشى-قون ساياساتىنىڭ وزەكتى جايتتارى قوزعالىپ، ىشكى ىستەر ورگاندارىندا جىل ىشىندە اتقارىلعان جۇمىستار سارالاندى.
– ءبىز بۇگىن ەلىمىزدىڭ ازاماتتىعىن قابىلداۋعا نيەت بىلدىرگەن، قازاقستاندىق بولۋعا ىنتالىلىق تانىتقان كوپتەگەن شەتەلدىكتەردىڭ وتىنىشتەرىن قارايمىز، – دەدى مەملەكەتتىك حاتشى جيىندى اشارداعى سوزىندە. – قازاقستان جىل وتكەن سايىن الەم تانىعان، دۇنيە ءجۇزى مويىنداعان قۋاتتى دا ايبىندى مەملەكەتكە اينالىپ كەلەدى.
ەلىمىزدىڭ الەۋمەتتىك-ساياسي ءجانە ەكونوميكالىق دامۋىندا قول جەتكىزگەن وراسان زور تابىستارى شەتەلدىكتەردىڭ قازاقستان ازاماتتىعىن الۋعا تالپىنىسىن دا تۋعىزۋدا. مۇندايلاردىڭ قاتارىندا رەسەي، ۋكراينا، لاتۆيا، ازەربايجان، وزبەكستان، گرۋزيا جانە باسقا دا ەلدەردىڭ وكىلدەرى بار. سوناۋ وتكەن عاسىردىڭ 90- جىلدارى ەلىمىزدەن شەت جاقتارعا اسىپ كەتكەن بۇرىنعى جەرلەستەرىمىز اراسىندا دا تۋعان جەرلەرىنە قايتىپ ورالۋعا قۇشتارلىق تانىتىپ وتىرعاندار از ەمەس.
– مۇنىڭ ءبارىن ەلباسىمىزدىڭ حالىقارالىق ارەناداعى جىل ساناپ ۇدايى ءوسىپ كەلە جاتقان زور بەدەلى مەن الەم جۇرتىنىڭ قازاقستاننىڭ كەلەشەگىنە دەگەن ءۇلكەن سەنىمىنىڭ بەلگىسى رەتىندە قابىلداۋعا ابدەن بولادى، – دەدى م.قۇل-مۇحاممەد بۇدان ءارى. – سوندىقتان دا ءبىز بۇگىن ەلىمىزدە العاش رەت تويلانعالى وتىرعان رەسپۋبليكامىزدىڭ ءبىرىنشى پرەزيدەنتى كۇنى قارساڭىندا جاڭا قازاقستاندىقتاردى ءوز ورتامىزعا قابىلداۋعا قۋانىشتىمىز. ولارعا ەجەلگى قازاق جەرىندە باقىتتى ءومىر كەشە وتىرىپ، ورتاق وتانىمىزدىڭ يگىلىگى جولىندا قالتقىسىز قىزمەت ەتە بەرۋدى تىلەيمىز. ولار ەندى قازاقستاننىڭ لايىقتى ازاماتى بولا وتىرىپ، ەلىمىزدىڭ دامۋىنا وزدەرىنىڭ قولدارىنان كەلگەن ۇلەستەرىن قوسا بەرەدى دەگەن سەنىمدەمىز. بۇل رەتتە ءبىزدىڭ ءبىرىنشى كەزەكتەگى مىندەتىمىز جاڭا وتانداستارىمىزدىڭ ەلىمىزدىڭ الەۋمەتتىك كەلبەتىنە تەز بەيىمدەلۋلەرىن قامتاماسىز ەتۋ بولسا، ەكىنشىدەن، رەسپۋبليكا يگىلىگى ءۇشىن جەمىستى بارىنشا قىزمەت ەتۋلەرىنە جان-جاقتى جاعداي جاساۋ بولىپ تابىلادى.
مەملەكەتتىك حاتشى ءوزىنىڭ سوزىندە بولاشاق وتانداستارىمىز ءۇشىن قازاقستاندىق قوعامعا ءتان ۇلتارالىق جانە كونفەسسياارالىق تۇراقتىلىق باستاۋلارىن تەرەڭ جاۋاپكەرشىلىكپەن ۇعىنۋدىڭ اسا ماڭىزدى ماسەلە ەكەنىن اتاپ ءوتتى. ەلباسىنىڭ باستاۋىمەن جىلدار بويى قالىپتاسىپ، بەرىك داستۇرگە اينالعان بۇل تاتۋلىق شەڭبەرىن ۇدايى كوزدىڭ قاراشىعىنداي قورعاپ، ونى ەلىمىزدىڭ ىلگەرى ورلەۋى جولىنداعى ورتاق ماقساتتار ءۇشىن ساقتاپ وتىرۋدىڭ ءمانى وتە جوعارى. ماسەلەنىڭ وسى جاعىنا ايرىقشا نازار اۋدارعان مۇحتار قۇل-مۇحاممەد بۇدان كەيىن كوميسسيانىڭ ءبىرقاتار ءمۇشەلەرىنىڭ كۇن تارتىبىندەگى ماسەلەلەرگە بايلانىستى ەسەپتەرىن تىڭدادى.
كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى.
سەرىك ءپىرنازار،
«ەگەمەن قازاقستان».
---------------------------------------------------------------
تاقىرىپ تۋرالى باسقا ب ا ق وكىلدەرى نە دەيدى؟
پىكىر قالدىرۋ