30 قاراشا كۇنى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ق ر تۇڭعىش پرەزيدەنتى كۇنىندە ۇيىمداستىرىلعان سالتاناتتى كەشتە، ق ر ءماجىلىسىنىڭ دەپۋتاتى، اۋعان سوعىسى ارداگەرلەرى ۇيىمىنىڭ «قازاقستان ارداگەرلەرى» قاۋىمداستىعىنىڭ ءتوراعاسى، اۋعان سوعىسىنىڭ ارداگەرى، قوعام قايراتكەرى، اقىن – باقىتبەك سماعۇلوۆ، تەاترىمىزدىڭ كوركەمدىك جەتەكشىسى- ەرلان ءابدىلدا ۇلى ءبىلالوۆتى  حالىق باتىرى باۋىرجان مومىش ۇلى اتىنداعى «نامىس» وردەنىمەن ماراپاتتادى. تەاتر جانرىندا تالماي ەڭبەك ەتىپ كەلە جاتقان ەرلان ءابدىلدا ۇلى، بۇعان دەيىن م.اۋەزوۆ اتىنداعى قازاق مەملەكەتتىك اكادەميالىق تەاترى ساحناسىندا تالاي وبرازداردى سومداعان. اتاپ ايتساق، م.اۋەزوۆتىڭ «قيلى زامان» دراماسىندا ۇزاق باتىر، ي.ساپاربايەۆتىڭ «سىعان سەرەناداسىندا» ءشامشى، د.يسابەكوۆتىڭ «جاۋجۇرەك» دراماسىندا بالۋان شولاق، ءا.تارازي «اقىن. پەرىشتە. ماحاببات.» مۇقاعالي ت.ب.  ال، ءدال وسى داڭقتى قولباسشى اتىنداعى  مارتەبەلى وردەندى ش.ايتماتوۆ پەن ق.مۇحامەتجانوۆتىڭ «كوكتوبەدەگى كەزدەسۋ» تۋىندىسىنداعى مامبەت ءرولى ءۇشىن بەرىلگەنىن اتاپ وتكەنىمىز ءجون بولار.

 تۇڭعىش پرەزيدەنت كۇنىمەن تۇسپا-تۇس كەلگەن مەرەيلى ساتتە ءوز  تاراپىمىزدان تىلەرىمىز – ەڭبەكتە تولاعاي تابىستارعا، ماقساتتا بيىك شىڭدارعا جەتە بەرىڭىز، ابىروي-بەدەلىڭىز ارتا بەرسىن، ءجۇزىڭىز جارقىن، مەرەيىڭىز ۇستەم بولسىن دەگىمىز كەلەدى!