قازاقستاندىق تاراپتى ق ر پرەمەر-مينيسترىنىڭ ءبىرىنشى ورىنباسارى ا. مامين، بەلارۋس تاراپىن – بر پرەمەر-مينيسترىنىڭ ءبىرىنشى ورىنباسارى ۆ. ماتيۋشيەۆسكيي باسقاردى.

ۇاك وتىرىسى بارىسىندا ساۋدا، ينۆەستيسيالار، ونەركاسىپ كووپەراسياسى، اۋىل شارۋاشىلىعى، عىلىم جانە تەحنولوگيالار، كولىك جانە لوگيستيكا سالالارىنداعى ەكىجاقتى ىنتىماقتاستىقتى دامىتۋ ماسەلەلەرى تالقىلاندى.

اسقار مامين قازاقستان مەن بەلارۋستىڭ ەۋرازيالىق ەكونوميكالىق وداقتاعى، پوستكەڭەستىك كەڭىستىكتەگى ينتەگراسيالىق بىرلەستىكتەرگە قاتىسۋى سەكىلدى بارلىق دەڭگەيدەگى مەملەكەتارالىق بايلانىستارىنىڭ تابىستى جۇرگىزىلىپ كەلە جاتقاندىعىن اتاپ ءوتتى. 

تاراپتار العاشقى جەتى ايدىڭ قورىتىندىسى بويىنشا قازاقستان مەن بەلارۋس اراسىنداعى ساۋدا اينالىمىنىڭ ارتقاندىعىن ەرەكشە اتاپ ءوتتى. ماسەلەن، 2017 جىلعى قاڭتار-شىلدە ارالىعىنداعى ساۋدا اينالىمى $313،7 ملن. قۇراپ، وتكەن جىلدىڭ سايكەس مەرزىمىمەن سالىستىرعاندا 75،6% وسكەندىگى بايقالدى.

«2020 جىلدارعا قاراي ەكى ەل اراسىنداعى ساۋدا اينالىمىن 1 ملرد. اقش دوللارىنا جەتكىزۋىمىز كەرەك»، — دەپ اتاپ ءوتتى ا. مامين.

ۇاك قازاقستاندىق تارابىنىڭ تەڭتوراعاسى ا. ءماميننىڭ ايتۋىنشا، قازاقستان مەن بەلارۋس مەملەكەتتەرىنىڭ ونەركاسىپ كووپەراسياسى، كولىك-لوگيستيكالىق سەكتوردا، عارىش سالاسىندا، اگروونەركاسىپ كەشەنىندە، مادەني- گۋمانيتارلىق جانە عىلىمي-تەحنيكالىق سالالاردا بىرلەسكەن جوبالاردى تابىستى جۇزەگە اسىرۋعا الەۋەتى جەتكىلىكتى.

تاراپتار قازاقستان مەن بەلارۋس اراسىنداعى كولىك-لوگيستيكالىق ينفراقۇرىلىمدى دامىتۋ مەن شىعاراتىن ونىمدەردىڭ تۇرلەرىن كوبەيتىپ، اۋدانداستىرۋداعى ەكى جاققا دا ءتيىمدى ىنتىماقتاستىقتى ودان ءارى جالعاستىرۋعا ىقىلاس تانىتتى.

«سوڭعى جىلدارى ءوڭىرارالىق ىنتىماقتاستىقتا تۇراقتى قارقىن بايقالادى»، — دەي كەلىپ ۆ. ماتيۋشيەۆسكيي «بۇگىنگى تاڭدا بەلارۋستا قازاقستاندىق ينۆەستيسيالاردىڭ قاتىسۋىمەن 100-دەن استام كاسىپورىن قىزمەت ەتەتىنىن، بەلارۋس تارابى ينۆەستيسيالىق جوبالار مەن ءوزارا ءتيىمدى ينۆەستيسيالاردى ودان ءارى جۇزەگە اسىرۋعا جان-جاقتى قولداۋ كورسەتۋگە ءازىر ەكەنىن جەتكىزدى.

تاراپتار مال جانە وسىمدىك شارۋاشىلىعى، مەليوراسيا جانە جەردى سۋلاندىرۋ سەكىلدى سالالاردا بىرلەسكەن جوبالاردى جۇزەگە اسىرۋ ءۇشىن، ىنتىماقتاستىقتىڭ كەلەشەكتى باعىتتارى بويىنشا بىرلەسكەن جۇمىس توبىن قۇرۋ مۇمكىندىگىن قاراستىردى.

بۇدان وزگە، قازاقستاندىق كومپانيالاردىڭ اۋىل شارۋاشىلىعى ونىمدەرىن بەلارۋسقا، ال بەلارۋس ونىمدەرىن قازاقستانعا جەتكىزۋ ماسەلەلەرى تالقىلاندى.

بيىل قاراشادا قازاقستاننىڭ سىرتقى ساۋدا پالاتاسى مەن بەلارۋس ساۋدا-ونەركاسىپتىك پالاتاسى اراسىندا قازاقستان-بەلارۋس ىسكەرلىك كەڭەسىن قۇرۋ جونىندەگى كەلىسىمگە قول قويۋ جوسپارلانىپ وتىر.

ساۋدا-ەكونوميكالىق ىنتىماقتاستىق جونىندەگى قازاقستان-بەلارۋس ۇكىمەتارالىق كوميسسياسىنىڭ 13-وتىرىسىنىڭ قورىتىندىسى بويىنشا ءتيىستى حاتتاماعا قول قويىلدى.

ق ر پرەمەر-مينيسترىنىڭ ءبىرىنشى ورىنباسارى ا. مامين قاراعاندى وبلىسىنا ساپارى بارىسىندا «وڭتۇستىك — سولتۇستىك» اۆتوكولىك ءدالىزىنىڭ قاراعاندى – تەمىرتاۋ تەلىمىندەگى قۇرىلىس بارىسىنا تەكسەرۋ جۇرگىزىپ، قۇرىلىس باسىندا كوشپەلى كەڭەس وتكىزدى. اتالمىش جوبا «نۇرلى جول» باعدارلاماسى اياسىندا جۇزەگە اسىرىلىپ جاتىر. 14 شاقىرىمدىق اۆتوجولدا جولدىڭ ۇستىڭگى جابىندىسى توسەلىپ، كولىكتىك جول ايىرىقتارىنىڭ قۇرىلىسى جۇرگىزىلۋدە. قۇرىلىس نىسانىن 2018 جىلى پايدالانۋعا بەرۋ جوسپارلانىپ وتىر.

«قازىرگى تاڭدا جول قۇرىلىسىن جۇرگىزۋشىلەردىڭ الدىنداعى باستى مىندەت – جەرگىلىكتى تۇرعىنداردىڭ قاتىناۋىنا قيىندىق تۋعىزباي، جول تەلىمىن جاڭعىرتۋ جۇمىستارىن دەر كەزىندە ءارى ساپالى ەتىپ تاپسىرۋدى قامتاماسىز ەتۋ»، — دەپ اتاپ ءوتتى ا. مامين. 

ا. مامين وڭىرگە ساپارى بارىسىندا «قازبەلاز» بك، تاۋ-كەن بايىتۋ جابدىقتارىن شىعاراتىن كاسىپورىن، اۆتوكولىك قۇرالدارىن كادەگە جاراتۋ كەشەنى، جوبالىق قۋاتتىلىعى جىلىنا 4 ملن. ينەكسيالىق پرەپاراتتار قورابىن شىعاراتىن فارماسيەۆتيكالىق كاسىپورىندا بولىپ، ولاردىڭ جۇمىستارىمەن  تانىستى.