تالدىقورعان قالاسىندا استانا مەن الماتى قالالارى جانە رەسپۋبليكانىڭ قالعان 13 وڭىرىنەن كەلگەن بارلىعى 30 جاس كاسىپكەردىڭ قاتىسۋىمەن جاستار بيزنەس-تاعىلىمدامالارى جوباسى ءوتتى، دەپ حابارلايدى Qamshy.kz اقپارات اگەنتتىگى.
قاتىسۋشىلار 5 كۇن ىشىندە اسحات ابجانوۆ، اسقار اسكەروۆ، سۆەتلانا درۋز، اسلان ەسجان ۇلى سياقتى تابىستى كاسىپكەرلەر وتكىزگەن ترەنينگتەرگە قاتىستى. سونداي-اق، قاتىسۋشىلار ەلباسىنىڭ «رۋحاني جاڭعىرۋ» باعدارلاماسىنداعى ماڭىزدى يدەيالاردىڭ ءبىرى سانا جاڭعىرتۋىنا بايلانىستى تاقىرىپتارعا شولۋ جاساپ، يننوۆاسيالىق تەحنولوگيالار، كراۋدفاندينگ، كوپشىلىك الدىندا سويلەۋ ونەرى سياقتى ترەنينگتەرگە قاتىستى.
تاعىلىمدامادان ءوتۋ باعدارلاماسى، سونىمەن بىرگە الدىڭعى قاتارلى شاعىن جانە ورتا بيزنەس كاسىپورىندارىنا بارىپ، تاجىريبە جيناقتاۋدى كوزدەيدى. دەلەگاتتار مۇمكىندىگى شەكتەۋلى جاستارعا ارنالعان «اسار» فيتنەس كلۋبىندا، «تيۋرسكيي دۆوريك» دەمالىس بازاسىندا، «قاينار-اكب» اككۋمۋلياتور زاۋىتىندا، «ارلەن» بالا-باقشاسىندا، «TANDOOR» كافەسىندە جانە ت.ب. كاسىپورىنداردا بولدى. سونداي-اق، ولار ق ر الماتى وبلىسىنىڭ «اتامەكەن» ۇلتتىق كاسىپكەرلەر پالاتاسىنا بارىپ، شاعىن جانە ورتا بيزنەستى قولداۋ باعىتىنداعى مەملەكەتتىڭ جاساپ جاتقان شارالارىمەن تانىسۋعا مۇمكىندىك الدى. تاعىلىمدامانىڭ جابىلۋ سالتاناتىندا بارلىق قاتىسۋشىلارعا جوباعابەلسەندى قاتىسقانى ءۇشىن سەرتيفيكاتتار تابىستالدى.
«ەلباسىمىز ن.ءا.نازاربايەۆ «بولاشاققا باعدار: رۋحاني جاڭعىرۋ» ماقالاسىندا ايتقانداي، سانانىڭ اشىقتىعى – ول جاڭا تەحنولوگيانىڭ اعىنى الىپ كەلەتىن وزگەرىستەردىڭ بارىنە دايىن بولۋ دەگەن ءسوز. تاياۋداعى ون جىلدا ءبىزدىڭ ءومىر سالتىمىز: جۇمىس، تۇرمىس، دەمالىس، باسپانا، ادامي قاتىناس تاسىلدەرى، قىسقاسى، بارلىعى تۇبەگەيلى وزگەرەدى. ءبىز بۇعان دا دايىن بولۋىمىز كەرەك. جاستار كاسىپكەرلىگىنە قولداۋ كورسەتۋ ماقساتىندا قازاقستان جاستارىنىڭ كونگرەسى جانە ق ر ءدىن ىستەرى جانە ازاماتتىق قوعام مينيسترلىگى جىل سايىن جاستار بيزنەس-تاعىلىمدامالارىن وتكىزىپ كەلەدى. بۇل جوبا جاستاردىڭ ءوز ىستەرىن اشۋعا، بولۋى مۇمكىن تاۋەكەلدەردى ەسەپتەۋگە جانە باسقا دا كاسىپكەرلەرمەن تاجىريبە الماسۋعا مۇمكىندىك بەرەدى. 2016 جىلدان بەرى بۇگىنگى كۇنگە دەيىن جالپى سانى 90-نان استام جاستارىمىز تاعىعىلىمدامادان ءساتتى ءوتتى. جوبانى جۇزەگە اسىرۋ ءۇشىن قول ۇشىن سوزعان بارلىق سەرىكتەستەرىمىزگە العىس بىلدىرەمىن»، دەپ اتاپ ءوتتى «قازاقستان جاستارىنىڭ كونگرەسى» ءزتب-نىڭ اتقارۋشى ديرەكتورى ءسابيتوۆ ايدىن مارات ۇلى.
تاعىلىمدامانى وتكىزۋدەگى باستى ماقسات – جاستاردىڭ يننوۆاسيالىق جانە كاسىپكەرلىك الەۋەتىن ارتتىرۋعا جاردەمدەسۋ، سونداي-اق، شاعىن جانە ورتا بيزنە كاسىپورىندارىنىڭ جۇمىسىمەن تىكەلەي تانىستىرۋ ارقىلى جاس كاسىپكەرلەردىڭ بىلىكتىلىگىن ارتتىرۋ بولىپ تابىلادى.
جوبانىڭ ەڭ جاس قاتىسۋشىلارىنىڭ ءبىرى - الماتىلىق مۇحيت اسقار ۇلى ءوزىنىڭ العان اسەرىمەن ءبولىستى.
«مەنىڭ جاسىم 19-دا. مەن «Qazaqstanwatches» ينتەرنەت-دۇكەنىنىڭ جەتەكشىسىمىن، عالامتور جانە الەۋمەتتىك جەلىلەر ارقىلى قول ساعاتتارىن ساتۋمەن اينالىسامىن. جاستار بيزنەس-تاعىلىمدامالارى جوباسىنان بيزنەستەگى باستى ماقساتىما جەتۋ جولىندا كەڭەستەر، كاسىبي كونسۋلتاسيا جانە ءوز كاسىبىمدى دامىتۋعا ارنالعان اقپاراتقا كەڭىنەن قانىق بولدىم. ۇيىمداستىرۋشىلارعا وتە ريزامىن»-دەپ قۋانىشىن ءبىلدىردى مۇحيت اسقار ۇلى.
جاستار كاسىپكەرلىگىنىڭ دامۋى زاماناۋي كەزەڭدە حالىق اراسىنداعى ەڭبەكپەن قامتۋ كورسەتكىشتەرىنىڭ جوعارىلاۋىنا جانە بىلىكتى قىزمەتكەرلەر دايىنداۋعا عانا ەمەس، ەلىمىزدىڭ يننوۆاسيالىق دامۋ جولىنا تەزىرەك وتۋىنە جول اشۋى قاجەت.
مەملەكەتتىڭ ەكونوميكالىق تۇراقتىلىعىنىڭ نەگىزگى تىرەگىن بيزنەس سالاسى قۇرايدى. ال، جاستارعا وسى بيزنەستىڭ قىر-سىرىن وقىتىپ، ءتۇسىندىرۋ ارقىلى ولاردىڭ كاسىبي قۇزىرەتتىلىگىن ارتتىرۋعا بولادى.
