ەلباسى تاپسىرماسىمەن ق ر پرەمەر-مينيسترى باقىتجان ساعىنتايەۆ وڭتۇستىك قازاقستان وبلىسىنا باردى، دەپ حابارلايدى Qamshy.kz اقپارات اگەنتتىگى ق ر پرەمەر-مينيسترىنىڭ سايتىنا سىلتەمە جاساپ.
ۇكىمەت باسشىسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنىڭ، سونداي-اق اوك-نى دامىتۋ جانە «نۇرلى جول» مەملەكەتتىك باعدارلامالارىنىڭ، «نۇرلى جەر» تۇرعىن ءۇي قۇرىلىسى باعدارلاماسىنىڭ، ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنىڭ ىسكە اسىرىلۋ بارىسىمەن تانىسادى دەپ كۇتىلۋدە.
باقىتجان ساعىنتايەۆتىڭ وقو-عا جۇمىس ساپارى تۇركىستان قالاسىنان باستاۋ الدى. وندا ونىمدەرى وبلىستىڭ بارلىق اۋداندارىنا جەتكىزىلەتىن «ياسسى نان» نان زاۋىتىندا بولىپ قايتتى.
كاسىپورىندى ارالاۋ بارىسىندا «اق جول» ج ش س باسقارۋشى كومپانياسىنىڭ باسشىسى سابىر اتايەۆ پرەمەر-مينيسترگە وندىرىستىك سەحتاردى كورسەتىپ، زاۋىتتىڭ قازىرگى قىزمەتى مەن ونى جاڭعىرتۋ كەلەشەگى تۋرالى ايتىپ بەردى.
«اق جول» ج ش س كاسىپورنى نان-توقاش جانە شۇجىق ونىمدەرىن شىعارۋمەن اينالىسادى. مۇندا 2016 جىلى - 288 ملن تەڭگەگە، 2017 جىلدىڭ سەگىز ايىندا 839 ملن تەڭگەگە ءونىم ءوندىرىلدى. كومپانيا شاعىن جانە ورتا بيزنەس پەن جاپپاي كاسىپكەرلىككە مەملەكەتتىك قولداۋ كورسەتۋدىڭ جارقىن مىسالى.
بۇدان كەيىن باقىتجان ساعىنتايەۆ تۇركىستاننىڭ ءبىرقاتار الەۋمەتتىك ينفراقۇرىلىم نىساندارىندا بولىپ قايتتى، سولاردىڭ ىشىندە ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى (حقتۋ) دە بار. وندا ۋنيۆەرسيتەت رەكتورى ءۋاليحان ابدىبەكوۆ وقۋ ورنىنىڭ ينفراقۇرىلىمىن تانىستىرىپ، جوو-نىڭ دامۋى مەن وسىندا قولدانىلاتىن ءبىلىم بەرۋ باعدارلامالارى تۋرالى باياندادى.
بۇگىندە حقتۋ-دا 1 مىڭنان استام وقىتۋشى جۇمىس ىستەيدى، 105 ماماندىق بويىنشا شامامەن 9 مىڭ ستۋدەنت، سونىڭ ىشىندە 700-دەن استام شەتەلدىك جاس ءبىلىم الۋدا. مۇندا ارنايى ۋنيۆەرسيتەتتىك قالاشىق تۇرعىزىلعان.
بۇدان كەيىن «نۇرلى جەر» باعدارلاماسى اياسىندا سالىنعان «وتىرار» شاعىن اۋدانىنا باردى. تۇركىستان قالاسىنىڭ اكىمى الىپبەك وسەربايەۆ ۇكىمەت باسشىسىنا قۇرىلىسى اياقتالعان ۇيلەردىڭ بىرىندە باسپانالاردىڭ ساپاسىن كورسەتىپ، قالانى دامىتۋدىڭ پەرسپەكتيۆالىق-ينفراقۇرىلىمدىق جوسپارىمەن تانىستىردى. ونىمەن قوسا، اكىم «نۇرلى جەر» باعدارلاماسىن ىسكە اسىرۋ بارىسى تۋرالى اقپارات بەردى.
كۇننىڭ ەكىنشى جارتىسىندا ق ر پرەمەر-مينيسترى جۇمىس ساپارىن شىمكەنت قالاسىندا جالعاستىرادى، وندا ءبىرقاتار كەڭەستەر وتكىزىپ، وندىرىستىك جانە الەۋمەتتىك نىسانداردى ارالايدى.
