مۋمباي تەمىر جول ۆوكزالىندا جاياۋ جۇرگىنشىلەرگە ارنالعان ەكى ستانسيا اراسىن قوساتىن كوپىردە 22 ادام قازا تاۋىپ، 32ء-سى اۋىر جاراقاتتاندى،- دەپ حابارلايدى Qamshy.kz اقپارات اگەنتتىگى.

قايعىلى وقيعا تاڭەرتەڭگى اسىعىس ساعاتتاردا «Elphinstone» ايالداماسىندا ماڭىزدى جەرگىلىكتى جولداردى قوساتىن جەردە ورىن العان.

سەنىمدى اقپارات كوزدەرى «وقيعانىڭ سەبەبى جاۋىننان پانا ىزدەگەن جۇرگىنشىلەردىڭ ءبىر ورىنعا توپتالۋىنان تۋىندادى»،- دەپ وتىر. زارداپ شەگۋشىلەر ەڭ جاقىن شاقىرىمداعى اۋرۋحاناعا جەتكىزىلگەن.

«قايعىلى جاعداي قاتتى جاۋعان نوسەردىڭ اسەرىنەن بولعان، جۇرگىنشىلەر كوپىردىڭ استىنا تۇراقتاعان. الدىڭعى قاتاردا تۇرعان ادامدار جىعىلىپ قالىپ، ارتىندا تۇرعانداردى دا قوسا قۇلاتقان. ولار اتالمىش جەردەن ەستەرى شىعىپ جۇگىرىپ ءبىرىن-بىرى يتەرمەلەگەن. قازا تاپقان 22 ادام ىشىندە 14 ەركەك پەن 8 ايەل بار»،-دەدى ينديالىق تەمىرجول قىزمەتىنىڭ وكىلى راۆيندرا بحاكار.

جاراقاتتانعانداردىڭ ءبىرى، اكاش ەسىمدى جىگىتتىڭ ايتۋىنشا: «جولاۋشىلار پويىزى اينالىپ جاتقان، كەيبىر جۇرگىنشىلەر ايالدامادان سىرتقا شىققىسى كەلدى، الايدا باسقالار ولارعا جول بەرمەدى. سىرتقا شىعامىن دەپ بەتتەگەن ادامداردىڭ ارەكەتتەرى پانيكالىق جاعداي تۋعىزدى».

ينديانىڭ پرەمەر-مينيسترى نارەندرا مودي ءوزىنىڭ تۆيتتەردەگى جازباسىندا «مۋمبايدا ورىن العان قايعىلى جاعدايدا قازا تاپقانداردىڭ وتباسىنا كوڭىل ايتاتىندىعىن جانە جاراقاتتانعاندار مەن  قازا تاپقانداردىڭ جاقىن-تۋىستارىنا شاما كەلگەنشە كومەك كورسەتەتىندىگىن» ايتتى.