بۇگىن، 30 قىركۇيەكتە الماتى وبلىسى شامالعان اۋىلىندا بولات ءابىش ۇلى نازاربايەۆتىڭ دەمەۋشىلىگىمەن، وبلىس اكىمىنىڭ قاتىسۋىمەن تۇرمىس-جاعدايى تومەن وتباسىلارعا ءۇي كىلتتەرى تابىستالدى. اتالعان يگى شاراعا Qamshy.kz اقپارات اگەنتتىگىنىڭ ءتىلشىسى قاتىسىپ، باسپانالى بولعان وتباسىلاردىڭ قۋانىشىنا ورتاقتاسىپ قايتتى.
شارانى الماتى وبلىسىنىڭ اكىمى باتالوۆ اماندىق عابباس ۇلى ءوز قۇتتىقتاۋ سوزىمەن اشتى. وبلىس اكىمى «مەنىڭ ءۇي كىلتتەرىن تاپسىرۋعا شىن مانىندە قۇقىعىم جوق. ءۇي كىلتتەرىن تابىستاۋ ءۇشىن ەمەس، راقمەت ايتۋعا كەلدىم»-دەيدى. اكىم ءوز سوزىندە وبلىستا مەكتەپتەردىڭ كوپتەپ سالىنىپ جاتقانىن، تۇرعىن ءۇي باعدارلامالارى بويىنشا ءۇي سالۋ قولعا الىنىپ جاتقانىن اتاپ ءوتتى.
بۇگىندە ءال-اۋقاتى، تۇرمىس جاعدايى تومەن، مۇمكىندىگى شەكتەۋلى، كوپ بالالى وتباسىلارعا ارناپ سالىنعان 20 ءۇيدىڭ 17ء-سى پايدالانۋعا دايىن. ماڭىزى زور، ساۋابى ۇلكەن ءىس جاساپ، ءال-اۋقاتى تومەن وتباسىلارعا ءۇي سالىپ بەرگەن بولات نازاربايەۆ ءۇي يەلەرىنە كىلتتەردى ءوزى تابىستادى. نۇرقانات ەرزات ۇلى، مۇستاپايەۆ شىڭعىس، تابۋلدينوۆا باقىتگۇل، يمانعالييەۆا باقىت، ماقسۇتوۆا زينات، دۇيسەنعالييەۆا تۇرسىنحان، قۇتتىباي ءدىلبار، ساعىندىقوۆ راقىم باسپانالى بولدى.
جەتى بالانىڭ اناسى باقىت يمانعالييەۆا بۇل قۋانىشتى ءساتتى قاتتى كۇتكەنىن جانە ۇيگە بۇگىننەن باستاپ كوشەتىنىن جەتكىزدى: «ءۇي الاتىنىمىزدى جاقىندا عانا حابارلاسىپ ايتتى. بۇرىن بەكبولاتوۆ اۋىلىندا تۇردىم. ونىڭ الدىندا تەك ۇمىتتەنىپ جۇرگەن بولاتىنبىز. بۇگىن بۇيىرسا ۇيگە كىرمەكپىن. وسىعان دەيىن ەشكىمگە حابارلاسىپ جاعدايىمدى ايتقان ەمەسپىن. بولات مىرزانى دا بۇگىن ءبىرىنشى رەت كورۋىم...»-دەيدى ول.
تابۋلدينوۆا باقىتگۇل: ۇيگە يە بولعانىمدى وسىدان شامامەن ەكى جۇما بۇرىن عانا ءبىلدىم. جەتى بالانىڭ اناسىمىن. ءبىزدى كوپ ادامدار بىلەدى، سولار جاعدايىم تۋرالى ايتقان بولۋى كەرەك-، دەيدى.
بولات نازاربايەۆ پەن وبلىس اكىمى اماندىق عابباس ۇلى جانە «اسىل ارنا» تەلەارناسىنىڭ باس ديرەكتورى مۇحامەدجان تازابەك تابىستالعان ۇيلەرگە كىرىپ، قونىس يەلەرىن قۇتتىقتادى.
بارلىق پاتەر سۋ قۇبىرىنا، ەلەكتر قۋاتىنا قوسىلعان جانە گازعا جالعانعان. ءار ءۇيدىڭ كولەمى - 120 شارشى مەتر.
نازەركە مۇسا
پىكىر قالدىرۋ