بۇگىن وبلىس اكىمىنىڭ وكىمىمەن قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى نەگىزىندە قىزىلوردا وبلىسى اكىمىنىڭ ورىنباسارى لاۋازىمىنا راۋان كەنجەحان ۇلى تاعايىندالدى.
راۋان كەنجەحان ۇلى 1979 جىلى شىعىس قازاقستان وبلىسىندا دۇنيەگە كەلگەن. اباي اتىنداعى الماتى مەملەكەتتىك ۋنيۆەرسيتەتىن - حالىقارالىق قاتىناستار ماماندىعى بويىنشا، رەسەي فەدەراسياسىنىڭ ۇكىمەتى جانىنداعى حالىق شارۋاشىلىعى اكادەمياسىن - ىسكەرلىك اكىمشىلىك ماستەرى ماماندىعى بويىنشا، سونداي-اق، اقش-تاعى گارۆارد ۋنيۆەرسيتەتىنىڭ حالىقارالىق قاتىناستار ورتالىعىنىڭ دج. كەننەدي اتىنداعى باسقارۋ مەكتەبىن بىتىرگەن.
ەڭبەك جولىن 1998 جىلى ۇلتتىق دەبات ورتالىعىندا كوورديناتور رەتىندە باستاعان. 2002-2005 جىلدارى «حابار» اگەنتتىگىنىڭ اقپاراتتىق باعدارلامالار ديرەكسياسىنىڭ رەداكتورى، رەسەي فەدەراسياسى بويىنشا مەنشىكتى ءتىلشىسى، 2005-2006 جىلدارى قازاقستان رەسپۋبليكاسىنىڭ رەسەي فەدەراسياسىنداعى ەلشىلىگىندە ەكىنشى جانە ءبىرىنشى حاتشى، 2006-2009 جىلدارى «قازاقستان» رەسپۋبليكالىق تەلەراديوكورپوراسياسىنىڭ ماڭعىستاۋ وبلىستىق فيليالىنىڭ ديرەكتورى، ماڭعىستاۋ وبلىسى اكىمىنىڭ قوعامدىق-ساياسي ماسەلەلەر جونىندەگى كەڭەسشىسى، 2010-2011 جىلدارى اقش-تاعى گارۆارد ۋنيۆەرسيتەتىندە لينگۆيستيكا دەپارتامەنتىنىڭ وقىتۋشىسى بولىپ قىزمەت اتقارعان. 2011 جىلدان وسى كەزگە دەيىن «Bilim Media Group» كومپانياسىنىڭ ديرەكتورى قىزمەتىن اتقارىپ كەلدى. قازاق، ورىس اعىلشىن جانە تۇرىك تىلدەرىن جەتىك مەڭگەرگەن.
ايماق باسشىسى ق.كوشەربايەۆ راۋان كەنجەحانۇلىن جاڭا قىزمەتىنە ساتتىلىك تىلەپ، وسى كەزگە دەيىن جيناقتاعان مول تاجىريبەسىن سىر ءوڭىرىن وركەندەتۋگە جۇمسايتىنىنا سەنىم ءبىلدىردى.

وسى ورايدا راۋان كەنجەحانۇلىن "قامشى" اقپاراتتىق پورتالىنىڭ اتىنان قۇتتىقتايمىز.