وسكەمەن قالاسىنداعى مەتاللۋرگتەر مادەنيەت سارايىندا ەلباسى نۇرسۇلتان نازاربايەۆتىڭ اتىنان بالالار ءۇيىنىڭ تاربيەلەنۋشىلەرى مەن جاعدايى تومەن وتباسىلاردىڭ بالالارىنا، وقۋ وزاتتارىنا جانە ءار ءتۇرلى بايقاۋلاردىڭ جەڭىمپازدارىنا ارنالعان ءداستۇرلى جاڭاجىلدىق شىرشا بولىپ ءوتتى. شاراعا قاتىسقان 200 بالانىڭ بارلىعىنا پلانشەت سىيعا بەرىلدى، دەپ حابارلايدى شقو اقپاراتتىق ورتالىعى.

بالا كۇلكىسى شالقىعان وسكەمەننىڭ تورىندە بالالارعا ارنايى مەرەكەلىك باعدارلاما ۇسىنىلدى. وبلىستىق جامبىل اتىنداعى دراما تەاترى مەن مەكتەپتەردەن، مۋزىكا مەكتەپتەرىنەن جينالعان 200-گە تارتا ءارتىس بۇلدىرشىندەردى قىزىققا بولەدى.

شىرشاعا جينالعان 9-13 جاس ارالىعىنداعى وقۋ وزاتتارى، جەتىمدەر مەن اتا-اناسىنىڭ قامقورلىعىنسىز قالعان بالالار ەلباسىنىڭ وزدەرىنە ارناعان بەينەجازباداعى قۇتتىقتاۋ ءسوزىن قۋانا تاماشالادى.

سونداي-اق، جاڭا جىلدىق شىرشا مەرەكەسىنە قاتىسۋشىلاردىڭ بەيىمدەلۋ ۇدەرىسىن جەڭىلدەتۋ، بىر-بىرىمەن تانىستىرا دوستاستىرۋ ماقساتىندا پسيحولوگيالىق ترەنينيگتەر وتكىزىلدى. شارا سوڭىندا بالالاردىڭ قۋانىشى ءتىپتى ەسەلەنە ءتۇستى. جىل بويى ۇزدىك وقىپ، پرەزيدەنت شىرشاسىنا قاتىسۋ باقىتى بۇيىرعان 200 بالانىڭ بارلىعىنا پلانشەتتەر تابىستالدى.

– 1-سىنىپتان بەرى ساباقتاردان تەك 5 الىپ كەلەمىن. بۇگىن كونسەرتكە دە توپتىق بيمەن قاتىستىم. پلانشەت العانىما وتە قۋانىشتىمىن. جاقسى وقىپ كەلەسى جىلى دا شىرشاعا قاتىسقىم كەلەدى، – دەپ قۋانىشىمەن ءبولىستى سەمەيدەگى «ءۇمىت» بالالار ۇيىندە تۇراتىن 6ء-شى سىنىپتىڭ وقۋشىسى

ەرنۇر جادرەنوۆ