2017 جىلعى 7 قاراشادا ەنەرگەتيكا ءمينيسترى قانات بوزىمبايەۆ جۇمىس كەڭەسىن وتكىزدى. وندا قازاقستاننىڭ ءۇش ءموز-ىن جاڭعىرتۋدىڭ اعىمداعى ماسەلەلەرى تالقىلاندى. توپ-مەنەدجەرلەردىڭ ءارقايسىسى زاۋىتتارداعى قالىپتاسقان جاعدايدى جانە ججم-نىڭ بارلىق ءتۇرىن جەتكىلىكتى مولشەردە ءوندىرۋدىڭ جاڭا مەرزىمدەرى تۋرالى باياندادى دەپ حابارلايدى Qamshy.kz اقپارات اگەنتتىگى ق ر ەم باسپا ءسوز قىزمەتىنە سىلتەمە جاساپ. 

پمحز باس ديرەكتورى شۋحرات دانبايدىڭ اقپاراتى بويىنشا ەۋرو-4 جانە ەۋرو-5 كلاستى جوعارى وكتاندى بەنزيندى ۇلكەن كولەمدە وندىرۋگە مۇمكىندىك بەرەتىن جابدىق – كاتوليتيكالىق كرەكينگتىڭ جاڭا قوندىرعىسىن سىناۋ 10 قاراشاعا بەلگىلەنگەن.

الايدا، تاعى ءبىر ۇلكەن پروبلەما بار ەكەندىگى انىقتالدى – زاۋىتتا ديزەل وتىنىن وندىرۋگە قاجەت سۋتەكتى ءوندىرۋ قوندىرعىسى بىرنەشە اپتا بويى جۇمىس ىستەمەي تۇر. ونى جوندەۋ جەلتوقساننىڭ ورتاسىنا دەيىن سوزىلۋى مۇمكىن، بۇل ەلىمىزدە ديزەل وتىنىنىڭ جەتىسپەۋشىلىگىنە الىپ كەلۋى مۇمكىن.

«قاراشا جانە جەلتوقسان ايلارىندا زاۋىتتا ديزەل وتىنىن ءوندىرۋ 150 مىڭ توننادان 25 مىڭ تونناعا دەيىن تومەندەيدى، ياعني اي سايىن 125 مىڭ تونناعا كەم. بۇل ايقىن جاعداي. سىزدەر جۇمىستى ورىندامادىڭىزدار»، - دەدى ق. بوزىمبايەۆ ش. دانبايعا.

ءوز كەزەگىندە، «قازمۇنايگاز» ۇك» اق باسقارما ءتوراعاسى ساۋات مىڭبايەۆ ىشكى نارىقتا ساتۋ ءۇشىن قازىرگى نارىقتىق باعامەن – ليترىنا 157-160 تەڭگە - يمپورتتىق (رەسەيلىك) ديزەل وتىنىن ساتىپ الۋ ارقىلى كومپانيا ءوز شىعىنى ەسەبىنەن قالىپتاسقان پروبلەمانى شەشەتىندىگىن حابارلادى.

ق ر ەنەرگەتيكا مينيسترلىگىندە وتكەن كەڭەستىڭ قورىتىندىلارى بويىنشا «قازمۇنايگاز – قايتا وڭدەۋ جانە ماركەتينگ» اق ديرەكتورلار كەڭەسىنىڭ شەشىمىمەن دانباي شۋحرات ابدۋراشيتوۆيچ اتقاراتىن قىزمەتىنەن بوساتىلدى. «پمحز» ج ش س باس ديرەكتورىنىڭ مىندەتىن اتقارۋشى بولىپ السەيتوۆ وسپانبەك بالتابايەۆيچ تاعايىندالدى.