جەزقازعان قالاسىندا كەتبۇقا ەسكەرتكىشى رەسمي اشىلدى، دەپ حابارلايدى Qamshy.kz اقپارات اگەنتتىگى.

اشىلۋ سالتاناتىنا قاراعاندى وبلىسىنىڭ اكىمى ەرلان قوشانوۆ، مەملەكەت قايراتكەرى، قازاقستاننىڭ حالىق قاھارمانى مۇحتار التىنبايەۆ، كورنەكتى قوعام قايراتكەرلەرى، شىعارماشىلىق زيالى قاۋىم وكىلدەرى قاتىستى.

شىڭعىس حان زامانىنىڭ ىقپالدى تۇلعاسى، اتاقتى جىراۋ، كەمەڭگەر بي، ەرجۇرەك قولباسشى كەتبۇقا بابانىڭ ەل تاريحىندا الار ورنىن ەرەكشە ايتۋعا بولادى. 

الەمدىك دەڭگەيدە كەتبۇقا بۇكىل يران مەن كىشى ازياعا ۇستەمدىك جۇرگىزگەن، يەرۋساليمگە جورىققا اتتانعان حۋلاعۋ حانزادانىڭ ساياسي كەڭەسشىسى جانە اسكەرباسى بولعان. اراب تاريحشىلارىنىڭ ەڭبەكتەرىنەن كەتبۇعا نوياننىڭ ەرلىكتەرى تۋرالى ءبىرشاما تىڭ دەرەكتەر تابىلىپتى. پارسى ەلى مەن شامدى جاۋلاپ، وزىنە قاراتقان شىڭعىس حاننىڭ نەمەرەسى حۋلاعۋ حاننىڭ شام ەلىندەگى ورىنباسارى كەتبۇعا نويان بولعانى تۋرالى دا جازىلعان. وسىلايشا الەمگە اتى جەتكەن دانا جىراۋ ۇلىتاۋدا ۇيىسقان قازاقتىڭ باعانالى سياقتى ءبىر اتاسىنىڭ ءتۇپ قازىعى ەكەنى اي-قىندالىپ وتىر. 

ەل بولىپ اتقارعان ەلەۋلى ءىستىڭ ارقاسىندا قالانىڭ كورىكتى باقجولىنىڭ باس جاعىنان تاريحي تۇلعانىڭ ات ۇستىندەگى قولادان قۇيىلعان ەڭسەلى ەسكەرتكىشى بوي تۇزەدى. گرانيتپەن قاپتالعان تۇعىرىمەن قوسا ەسەپتەگەندە ەسكەرتكىشتىڭ بيىكتىگى — 10،5 مەتر. ات ۇستىندەگى جىراۋدىڭ ەسكەرتكىشى وكتيابر سەكەمانوۆتىڭ جەتەكشىلىگىمەن استانادا جاسالدى. ءمۇسىنشى ماماندارى — اسقار نارتوۆ پەن سەرىك رۇستەمبەكوۆ. ەسكەرتكىشى، تۇعىرى جانە بارلىق جۇمىستارى 81 ملن. تەڭگەگە جاسالعان بۇل يگى ءىستىڭ قارجىلاي سالماعىن «قازاقمىس» كورپوراسياسى مەن ونداعى ۇلت مۇددەسىنە جاناشىر ازاماتتاردىڭ كوتەردى. كەتبۇقانىڭ ماڭگىلىك تىنىس تاپقان جەرىنەن اكەلىنگەن توپىراقتى بابا تابانى تيگەن ءوڭىر قويناۋىنا بەرۋ ءراسىمى جوشى حان كەسەنەسىندە وتكىزىلىپ، قۇران باعىشتالدى.