ەلباسى جوعارى ەۋرازيالىق ەكونوميكالىق كەڭەستىڭ وتىرىسىنا جانە ونىڭ قورىتىندىسىنا ارنالعان بىرلەسكەن باسپا ءسوز ءماسليحاتىنا قاتىستى دەپ حابارايدى "اقوردا".

وتىرىسقا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى ۆلاديمير پۋتين، بەلارۋس پرەزيدەنتى الەكساندر لۋكاشەنكو، ارمەنيا پرەزيدەنتى سەرج سارگسيان جانە قىرعىزستان پرەزيدەنتى المازبەك اتامبايەۆ قاتىستى.

مەملەكەت باسشىلارى ەۋرازيالىق ەكونوميكالىق وداقتى 2015 جىلدان باستاپ ىسكە قوسۋ جانە ونىڭ شەتەلدىك سەرىكتەستەرمەن ءوزارا ىقپالداستىعى ماسەلەلەرىن قاراستىردى.

وتىرىس بارىسىندا مەملەكەت باسشىلارى ەاەو ورگاندارىنىڭ قىزمەتىن رەگلامەنتتەۋگە، وداق سوتى مەن كوميسسياسىن قۇرۋعا جانە ونىڭ جۇمىسىنا، سونداي-اق ت.مانسۇروۆتى ەۋرازيالىق ەكونوميكالىق كوميسسيانىڭ ەنەرگەتيكا جانە ينفراقۇرىلىم جونىندەگى aلقاسىنىڭ مۇشەسى (مينيستر) ەتىپ تاعايىنداۋعا بايلانىستى ءبىرقاتار شەشىمدەرگە قول قويدى.

سونىمەن قاتار، پرەزيدەنتتەر 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىزستان رەسپۋبليكاسىنىڭ قوسىلۋى تۋرالى شارتقا قول قويدى.

قازاقستان پرەزيدەنتى وتىرىس قورىتىندىسى ارنالعان باسپا ءسوز ءماسليحاتىنداعى سوزىندە 2015 جىل تاريحقا ەۋرازيالىق ىقپالداستىقتىڭ جاڭا كەزەڭى رەتىندە كىرەتىنىنە توقتالدى.

– كەلەسى جىلدىڭ 1 قاڭتارىنان باستاپ ەۋرازيالىق ەكونوميكالىق وداق تۋرالى شارت كۇشىنە ەنەدى. ەۋرازيانىڭ ۇلانعايىر كەڭىستىگىندە تۇڭعىش رەت ەرىكتى، تەڭقۇقىلى جانە ءوزارا ءتيىمدى نەگىزدە قۋاتتى تابيعي جانە رەسۋرستىق الەۋەتى، جاھاندىق جانە وڭىرلىك اۋقىمدا ستراتەگيالىق ماڭىزدى كولىك، ەنەرگەتيكا جانە تەحنولوگيالىق جۇيەسى بار ەكونوميكالىق بىرلەستىك قۇرىلادى، – دەدى مەملەكەت باسشىسى.

نۇرسۇلتان نازاربايەۆ ەلدەرىمىز ءححى عاسىرتىڭ سىن-قاتەرلەرىنە جاۋاپ بەرە وتىرىپ، ەكونوميكالىق الەۋەتتى بىرىكتىرگەنىن اتاپ كورسەتتى.

– ەۋرازيالىق ەكونوميكالىق وداق ەڭ الدىمەن قاراپايىم ادامدار مەن ولاردىڭ مۇددەلەرى ءۇشىن قۇرىلدى. بالتىقتان تىنىق مۇحيتىنا دەيىنگى، اركتيكادان تيان-شانعا دەيىنگى وراسان كەڭىستىكتە وداققا مۇشە مەملەكەتتەردىڭ 180 ميلليونعا جۋىق ازاماتتارى بيزنەس جۇرگىزۋگە، ەركىن ساۋدا مەن جۇمىسپەن قامتىلۋعا، كوممۋنيكاسيالاردى پايدالانۋعا، ءوڭىرارالىق ىنتىماقتاستىق پەن ءوزارا گۋمانيتارلىق ىقپالداستىقتى  كەڭەيتۋگە تەڭ مۇمكىندىكتەر الادى. بەرىك ەكونوميكالىق ىرگەتاس قۇرۋ ارقىلى ءبىز ەلدەرىمىز بەن حالىقتارىمىزدىڭ اراسىنداعى دوستىقتى، تاتۋ كورشىلىك پەن سەنىمدى نىعايتامىز، – دەدى قازاقستان پرەزيدەنتى.

مەملەكەت باسشىسى قاتىسۋشى ەلدەر بۇگىندە تاتۋلىقتىڭ، كەلىسىمنىڭ، ءوزارا پايدا مەن قولداۋدىڭ  ۇزاق مەرزىمدى باعىتىن تاڭداعانىنا نازار اۋداردى.

– ەكونوميكالىق تۇرعىدان ىقپالداسا وتىرىپ، ءبىز ساياسي ەگەمەندىكتىڭ، مادەني تاۋەلسىزدىكتىڭ جانە حالىقتارىمىزدىڭ تىلدىك بىرەگەيلىگىنىڭ مىزعىماس قاعيداتتارىن نىعايتامىز. سونىمەن بىرگە، الەمدىك نارىقتارداعى تۇراقسىزدىق، سانكسيالىق ساياسات، الەمنىڭ جەتەكشى دەرجاۆالارى اراسىنداعى سەنىمنىڭ السىرەۋى، ساياسي احۋالدىڭ ۋشىعۋ ءقاۋپى ەۋرازيالىق ەكونوميكالىق وداقتىڭ قالىپتاسۋ ۇدەرىسىنە ىقپال ەتەتىن بولادى. ءبىز بۇل سىن-قاتەرلەردىڭ ءبارىن ەسكەرەمىز، – دەدى نۇرسۇلتان نازاربايەۆ.

قازاقستان پرەزيدەنتى ەۋرازيالىق ەكونوميكالىق ىقپالداستىق يدەياسىن جۇزەگە اسىرۋعا اتسالىسقانداردىڭ بارلىعىنا ريزاشىلىعىن ءبىلدىردى.

– ءبىزدىڭ وداق قۇرۋعا باستاعان جولىمىز ەكى ونجىلدىقققا سوزىلدى. ول مەنىڭ 1994 جىلى م.لومونوسوۆ اتىنداعى ممۋ-دە سويلەگەن كەزىمدە ۇسىنىلعان يدەيادان ناقتى ءىس جۇزىندەگى شەشىمگە اينالدى. ءاربىر ەلىمىزدىڭ ۇلتتىق مۇددەلەلەرى، ەكونوميكالىق مۇمكىندىكتەرى ەسكەرىلگەن بارلىق قاجەتتى مەملەكەتارالىق قۇجاتتاردى دايىنداۋ ءۇشىن وراسان جۇمىس اتقارىلدى. مۇنىڭ ار جاعىندا ساراپشىلاردىڭ، ساياساتكەرلەردىڭ، دەپۋتاتتاردىڭ، بيزنەس پەن مەملەكەتتەرىمىزدىڭ جۇرتشىلىق وكىلدەرىنىڭ زور ەڭبەگى تۇر، – دەدى مەملەكەت باسشىسى.

نۇرسۇلتان نازاربايەۆ ەاەو قىزمەتىنىڭ شارتتارىن جەتىلدىرۋ جونىندەگى جۇمىستاردى جالعاستىرۋ قاجەتتىگىن ايتتى.

– ءبىز ىقپالداستىعىمىز وزگە مەملەكەتتەر ءۇشىن ەكونوميكالىق سەرىكتەستىكتىڭ تارتىمدى ۇلگىسىنە اينالىپ، ەاەو-قاتىسۋشىلار سانى ۇلعايۋى ءۇشىن ءبارىن جاساۋعا ءتيىسپىز. ءبىزدىڭ ەكونوميكالىق وداق – الەمنىڭ بارلىق ىقپالداستىق بىرلەستىكتەرىمەن، سونىڭ ىشىندە ەۋروپالىق وداقپەن دە ءوزارا ءتيىمدى ىنتىماقتاستىق ءۇشىن اشىق ۇيىم. ەلدەرىمىزدىڭ بارشا ازاماتتارىن ەۋرازيالىق ەكونوميكالىق وداقتىڭ قۇرىلۋىمەن قۇتتىقتايمىن، - دەدى قازاقستان پرەزيدەنتى.