سيريالىق لاگەرلەردەن 44 ايەل مەن بالالار شىعارىلدى، ولاردىڭ 11ء-ى قازاقستان مەن وزبەكستان ازاماتتارى، دەپ جازادى Qamshy.kz اقپارات اگەنتتىگى شەشەنستان رەسپۋبليكاسىنىڭ باسشىسى رامزان كادىروۆقا سىلتەمە جاساعان «يزۆەستيا» باسىلىمىنا سۇيەنىپ. 

«بارلىعىڭىزدى قۋانتقىم كەلەدى، تاياۋ شىعىس پەن سولتۇستىك افريكا ەلدەرىندەگى مەنىڭ وكىلىم سيريا لاگەرلەرىندە جۇرگەن 44 ايەل مەن بالالاردى الىپ شىقتى. ولاردىڭ ىشىندە 9 بالا مەن 2 ايەل وزبەكستان جانە قازاقستان ازاماتتارى. قالعاندارى – باشقورتستاننىڭ، داگەستاننىڭ جانە باسقا دا وڭىرلەردەن بارعان رەسەيلىكتەر مەن شەشەنستاننىڭ 10 ايەلى مەن بالالارى»، - دەپ جازادى بەيسەنبىدە ءوزىنىڭ  Instagram پاراقشاسىندا ر. كادىروۆ.

«وزبەكستان مەن قازاقستاننان بارعان ايەلدەر مەن بالالار تۋرالى ءبىلىپ، مەن زياد  مۋحاممەدوۆيچكە (تاياۋ شىعىس پەن سولتۇستىك افريكاداعى شەشەنستان رەسپۋبليكاسى باسشىسىنىڭ وكىلى  زياد سابسابي – قازتاگ) ولاردى الىپ شىعۋعا بارىنشا كۇش سالۋىن ءوتىندىم.  ەگەر ءقازىر سولاي جاساماساق، ولار باس بوستاندىعىنان ايىرۋ ورىندارىندا جىلداپ وتىرۋلارىنا تۋرا كەلەدى، ءتىپتى مىنا توزاقتان امان قالسا دا. نە دەسەك تە، بالالار وزدەرىنە جاقىن، تۋمالارىنىڭ قاسىندا بولادى.  جاقىن ارادا، مۇمكىن كەلەر اپتانىڭ باسىندا 44 ادامنان تۇراتىن توپ گروزنىيعا جەتكىزىلەدى. ءقازىر بارلىق ۇيىمداستىرۋشىلىق ماسەلەلەر  اياقتالۋدا»، - دەپ اتاپ ءوتتى شەشەنستان باسشىسى.

بۇعان دەيىن حابارلانعانداي، ر.كادىروۆتىڭ ايتۋىنشا، 2 قىركۇيەكتە گروزنىيعا ز.سابسابيمەن بىرگە تمد ازاماتتارىنىڭ كەزەكتى توبى بار بورت  يراكتان كەلدى. ۇشاق 12 ادامدى اكەلدى، 4 ايەل جانە 6 اي - 9 جاس ارالىعىنداعى 8 بالا.  ونىڭ اقپارىنشا، كەلۋشىلەر اراسىندا ءۇش بالاسى بار قازاقستان ازاماتى دا بولعان.