بۇگىن پرەزيدەنت نازاربايەۆ رەسەيگە ىسساپارمەن بارعانىن حابارلاعان بولاتىنبىز. چەليابينسكتە رەسەي جانە قازاقستان ەلى باسشىلارىنىڭ قاتىسۋىمەن ءوتىپ جاتقان XIV ءوڭىرارالىق ىنتىماقتاستىق فورۋمىنا باتىس قازاقستان وبلىسىنىڭ اكىمى ا.كولگىنوۆ تە قاتىسۋدا.
2003 جىلدان بەرى ءداستۇرلى تۇردە ۇيىمداستىرىلىپ كەلە جاتقان فورۋمنىڭ ماقساتى – ەكى ەلدىڭ اراسىنداعى ءتۇرلى سالاداعى ىنتىماقتاستىقتى بەكىتىپ، ساۋدا-ەكونوميكالىق، عىلىمي-تەحنيكالىق جانە مادەني بايلانىستاردى نىعايتۋ.
گەوگرافيالىق ورنالاسۋى مەن تاريحى جاعىنان بايلانىسى تەرەڭدە ەكى مەملەكەتتىڭ اراسىنداعى ساۋدا-ەكونوميكالىق قارىم-قاتىناستار وتە تىعىز. ماسەلەن، رەسەي ەلىنىڭ 5 بىردەي وبلىسىمەن شەكتەسەتىن باتىس قازاقستان وبلىسىنىڭ وزىندە رەسەي بيزنەس وكىلدەرىنىڭ قاتىسۋىمەن 160-تان اسا كاسىپكەرلىك سۋەكتىلەرى جۇمىس جاسايدى. سونداي-اق سوڭعى 3 جىلدىڭ ىشىندە تەك باتىس قازاقستان وبلىسىنىڭ ەۋرازيالىق ەكونوميكالىق وداقپەن اراداعى تاۋار اينالىمى 2 ملدر. اقش دوللارىن قۇراسا، بيىلدىڭ وزىندە رەسەي ەلىمەن 400 ملن. دوللاردى قۇراپ، 40 پايىز ءوسىمدى كورسەتىپ وتىر.
فورۋم اياسىندا قازاقستان مەن رەسەي فەدەراسياسى وبلىستارىنىڭ اراسىندا ارنايى كەلىسىمدەر جاسالدى. سونىڭ ىشىندە پەنزا وبلىسىنىڭ ۇكىمەتى مەن باتىس قازاقستان وبلىسىنىڭ اكىمدىگى ەكونوميكالىق، عىلىمي-تەحنيكالىق جانە مادەني ىنتىماقتاستىق تۋرالى كەلىسىمگە قول قويدى.
ءوز كەزەگىندە ءوڭىرارالىق فورۋمنىڭ ەكى ەل ءۇشىن دە اسا تيىمدىلىگىن اتاپ وتكەن وبلىس اكىمى ا.كولگىنوۆ:
- ءبىز ءۇشىن پەنزا وبلىسىنىڭ ءىT تەحنولوگيا، مەديسينا، فارماسيەۆتيكا، اۋىل شارۋاشىلىعى سالاسىندا جۇزەگە اسىرىپ جاتقان جوبالارى وتە قىزىقتى. ويتكەنى باتىس قازاقستان وبلىسىندا دا ماشينا جاساۋ، اۋىل شارۋاشىلىعى باعىتى جاقسى جولعا قويىلعان. سوندىقتان بۇگىن ءبىز جاساسقان كەلىسىمنىڭ اۋقىمى كەڭ، كوپ سالانى قامتيدى. ءقازىردىڭ وزىندە ەكى وبلىستىڭ وكىلدەرى بىر-بىرىمىزگە بارىپ، تاجىريبە الماسۋ جونىندە ۋاعدالاستىق. جالپى، مۇنداي شارالار جاقىنداستىرا تۇسەدى دەپ ويلايمىن. مىسالى بىلتىر استانا قالاسىندا ەكى مەملەكەت باسشىسى ن.نازاربايەۆ پەن ۆ.ءپۋتيننىڭ قاتىسۋىمەن وتكەن فورۋمدا باتىس قازاقستان وبلىسىنا قاتىستى ەكى قۇجاتقا قول قويىلعان بولاتىن. ونىڭ ءبىرى جۇردەك پويىزداردى ىسكە قوسۋ جانە ەكى ەل شەكاراسىنداعى تەكسەرىستەردى الىپ تاستاۋ بولسا، ەكىنشىسى جايىق وزەنىنە قاتىستى. بۇگىندە جۇردەك پويىزدار ارقىلى قاتىناۋ تۇرعىندارعا وتە قولايلى. ءبىر سوزبەن، حالىق وسىنداي كەلىسىمدەر نەگىزىندە جۇزەگە اساتىن شارالاردىڭ ناتيجەسىن كورۋدە، - دەدى.

فورۋم تاقىرىبى «ادام كاپيتالىنا يننوۆاسيالار ەنگىزۋ» بولعاندىقتان، مۇندا ەكى مەملەكەتتىڭ وقۋ ورىندارى مەن عىلىمي ورتالىقتارىنىڭ اراسىنداعى بايلانىس ماسەلەسى دە تالقىلاندى. ءقازىردىڭ وزىندە باتىس قازاقسان وبلىسىنىڭ بىرنەشە وقۋ ورىندارى مەن رەسەي وقۋ ورىندارىنىڭ اراسىنداعى بايلانىس تىعىز. ستۋدەنتتەرمەن اكادەميالىق الماسۋ، عالىم-ۇستازداردىڭ تاجىريبە ءبولىسۋى ماقساتىنداعى شارالار كوپتەپ جۇزەگە اسۋدا. سونىڭ ىشىندە م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ۇجىمى مەن پەنزا مەملەكەتتىك ۋنيۆەرسيتەتىنىڭ اراسىندا ارنايى كەلىسىم جاسالعان.
اتاپ وتكەنىمىزدەي، ءوڭىرارالىق بايلانىستى نىعايتۋدى كوزدەيتىن بۇل شاراعا ەكى مەملەكەتتىڭ باسشىسى قاتىسۋدا. فورۋم قورىتىندىسىندا قازاقستان مەن رەسەي اراسىنداعى ديپلوماتيالىق قارىم-قاتىناستاردىڭ ورناعانىنا 25 جىل تولۋىنا وراي ن.نازاربايەۆ پەن ۆ.پۋتين كەلىسىمدەرگە قول قويادى دەپ كۇتىلۋدە.