پرەزيدەنت نازاربايەۆ جىل باسىنداعى جولداۋىندا «قازاقستان – جاس، كوپ ۇلتتى، بولاشاعىنا سەنىمدى جانە قارقىندى دامىپ كەلە جاتقان مەملەكەت! ءبىز تاۋەلسىز قازاقستاننىڭ 25 جىلدىق دامۋ جولىنان وتتىك. الداعى 25 جىلدا بۇدان دا بيىك بەلەستەر كۇتىپ تۇر»، - دەگەن ەدى. انە سول جاس مەملەكەتتىڭ الىپ تەرريتورياسىن ءبىر عاسىر ۋاقىت بۇرىن الاش ارىستارى بەلگىلەپ، الاش اۆتونومياسىن قۇرعان. 

استاناداعى ەكسپو كونگرەسس ورتالىعىندا الاش پارتياسىنىڭ قۇرىلعانىنا 100 جىل تولۋىنا وراي «رۋحاني جاڭعىرۋ: الاش جانە ازاتتىق يدەياسىنىڭ ساباقتاستىعى» اتتى حالىقارالىق عىلىمي-تاجىريبەلىك كونفەرەنسيا باستالدى دەپ حابارلايدى Qamshy.kz اقپارات اگەنتتىگى.

كونفەرەنسيا بارىسىندا ق ر مەملەكەتتىك حاتشىسى گۇلشارا ءابدىقالىقوۆا  قاتىسۋشىلارعا ق ر پرەزيدەنتى نۇرسۇلتان نازاربايەۆتىڭ قۇتتىقتاۋ ءسوزىن وقىپ بەردى.

«الاش قوزعالىسىنىڭ 20 عاسىردىڭ باسىنداعى قازاق قاۋىمىنىڭ ساياسي-الەۋمەتتىك قۇقىقتارىن قورعاۋ، ۇلتتىق بىرەگەيلىگىن ساقتاپ قالۋ جولىنداعى كۇرەسى ەلگە قىزمەت ەتۋدىڭ جارقىن كورىنىستەرىنىڭ ءبىرى. الاش قوزعالىسىنىڭ پاسسيونارلىق يدەيالارى ءبىزدىڭ اتا-بابالارىمىزدىڭ ازاتتىق الىپ، دەربەس مەملەكەت قۇرۋ جولىنداعى سان عاسىرلىق اماناتىمەن ۇشتاسىپ جاتىر. سول كەزدەگى ۇلت زيالىلارى ارمان ەتكەن مەملەكەت تاۋەلسىزدىگى مەن ۇلت بوستاندىعىنا بۇگىنگى ۇرپاق قول جەتكىزدى. ەلىمىز ەگەمەندىك الىپ، الەمنىڭ الدىڭعى قاتارلى مەملەكەتتەرىمەن تەرەزەسىن تەڭەستىرىپ وتىر.

مەن «بولاشاققا باعدار: رۋحاني جاڭعىرۋ» اتتى ماقالامدا تاعىلىمى مول تاريحىمىزدى زەردەلەۋگە، ءتولتۋما مادەنيەتىمىزدى قولداۋعا قاتىستى ناقتى مىندەتتەردى اتاپ كورسەتتىم. ءبىز قوعامدىق سانانى قازىرگى زاماننىڭ تالابىنا ساي جاڭعىرتۋ ارقىلى ەلىمىزدىڭ تۇراقتى دامۋىن قامتاماسىز ەتۋدى ماقسات ەتىپ وتىرمىز. مەملەكەتىمىزدىڭ ەكونوميكالىق الەۋەتى ارقىلى حالقىمىزدىڭ باي تاريحي ءارى رۋحاني مۇراسىن دارىپتەۋگە دە زور مۇمكىندىك جاسالا بەرمەك»-دەلىندى ەلباسىنىڭ قۇتتىقتاۋ حاتىندا.