قازاقستان، تۇركىمەنستان مەن وزبەكستان سىرتقى ىستەر مينيسترلەرى ءۇش ەلدىڭ مەملەكەتتىك شەكارالارىنىڭ ءتۇيىسۋ نۇكتەسى تۋرالى كەلىسىمگە قول قويدى، دەپ حابارلايدى Qamshy.kz اقپارات اگەنتتىگى.

ق ر ءسىم باسپا ءسوز قىزمەتىنىڭ حابارلاۋىنشا، قول قويۋ ءراسىمى ساماركاند قالاسىندا بىرىككەن ۇلتتار ۇيىمىنىڭ «ورتالىق ازيا: تاريحى ءبىر، بولاشاعى ءبىر، تۇراقتى دامۋ مەن ءوزارا وركەندەۋ جولىنداعى ىنتىماقتاستىق» اتتى حالىقارالىق كونفەرەنسياسى اياسىندا ءوتتى.

سالتاناتتى راسىمگە قازاقستاننىڭ سىرتقى ىستەر ءمينيسترى قايرات ءابدىراحمانوۆ، تۇركىمەنستاننىڭ مينيسترلەر كابينەتى ءتوراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆ جانە وزبەكستاننىڭ سىرتقى ىستەر ءمينيسترى ابدۋلازيز كاميلوۆ قاتىستى.

شەكارانىڭ ءتۇيىسۋ نۇكتەسى تۋرالى كەلىسىمگە قول قويۋ قازاقستان، تۇركىمەنستان جانە وزبەكستان اراسىنداعى مەملەكەتتىك شەكارانى حالىقارالىق-قۇقىقتىق رەسىمدەۋدىڭ ءبىر كەزەڭىن تولىعىمەن اياقتاۋعا مۇمكىندىك بەرىپ، ءۇش مەملەكەتتىڭ ءوزارا سىيلاستىعىن، ەگەمەندى تەڭدىگى مەن اۋماقتىق تۇتاستىعىن نىعايتۋعا نەگىز بولادى.

«قازاقستان پرەزيدەنتى نۇرسۇلتان نازاربايەۆ تاۋەلسىزدىگىمىزدىڭ العاش كۇنىنەن باستاپ مەملەكەتتىك شەكارانىڭ دەليميتاسياسىن ءبىرىنشى كەزەككە قويعان. شىن مانىندە، بۇل مەملەكەتتىڭ جاۋاپتى قۇرىلىمى مەن قاۋىپسىزدىگىنىڭ ماسەلەسى بولىپ تابىلادى. بۇگىن قول قويىلعان ءۇش جاقتى كەلىسىم، نەگىزىنەن، ورتالىق ازيا ءۇشىن تاريحي بولىپ تابىلادى، سەبەبى ول ءۇش مەملەكەتىمىزدىڭ مەملەكەتتىك شەكارالارىن قۇقىقتىق رەسىمدەۋىن قورىتىندىلايدى»، - دەدى سىرتقى ىستەر ءمينيسترى قايرات ءابدىراحمانوۆ قول قويۋ ءراسىمى اياقتالعاننان كەيىن.

بۇرىن قازاقستان تۇركىمەنستانمەن جانە وزبەكستانمەن ەكىجاقتى دەڭگەيدە شەكارالار بويىنشا ۋاعدالاستىقتارعا قول جەتكىزگەن بولاتىن. قازاقستان رەسپۋبليكاسى مەن تۇركىمەنستان اراسىنداعى قازاقستان-تۇركىمەنستان مەملەكەتتىك شەكاراسىن دەليميتاسيالاۋ جانە ونى دەماركاسيالاۋ ۇدەرىسى تۋرالى كەلىسىمگە 2001 جىلعى 5 شىلدەدە، قازاقستان رەسپۋبليكاسى مەن تۇركىمەنستان اراسىنداعى قازاقستان–تۇركىمەنستان مەملەكەتتىك شەكاراسىن دەماركاسيالاۋ تۋرالى كەلىسىمگە 2017 جىلعى 18 ساۋىردە، قازاقستان رەسپۋبليكاسى مەن وزبەكستان رەسپۋبليكاسى اراسىنداعى قازاقستان–وزبەكستان مەملەكەتتىك شەكاراسى تۋرالى كەلىسىمگە 2001 جىلعى 16 قاراشادا، قازاقستان–وزبەكستان مەملەكەتتىك شەكاراسىنىڭ جەكە ۋچاسكىلەرى تۋرالى شارتقا 2002 جىلى 9 قىركۇيەكتە قول قويىلعان.