قازاقستان پرەزيدەنتى نۇرسۇلتان نازاربايەۆ "نۇر" ءسوزىن ءوز ەسىمىمەن بايلانىستىرماۋدى ەسكەرتتى جانە "نۇرلى جول" باعدارلاماسىنىڭ ءمانىن ءتۇسىندىردى، - دەپ حابارلايدى Tengrinews.kz ءتىلشىسى. 

"جۋىردا مەن ءبىر حات الدىم. وندا نە بولسا، سوعان "نۇر" دەگەن ءسوزدى قوسىپ قوياتىنى ايتىلدى، "سونى نەگە توقتاتپايسىز، بۇل جەكە باسقا تابىنۋعا اكەلىپ سوعادى عوي دەپ. مەن ەشكىمگە ءسوزدىڭ الدىنا “نۇر” دەپ قويىڭدار دەگەن جوقپىن. “نۇر” دەگەننىڭ ءبارىن مەنىڭ اتىممەن بايلانىستىرادى. جوق، ولاي ەمەس. مىنا ءبىزدىڭ جاڭا ەكونوميكالىق ساياساتىمىز دا “نۇرلى جول” دەپ اتالادى. “نۇرلى” دەگەن ساۋلەلى، جارقىن، اشىق، اق جول دەگەن ءسوز. ەگەر ولاي بولسا، "نۇر" دەگەندى قوسپايتىن بولايىق"، - دەدى قازاقستان پرەزيدەنتى جالپىۇلتتىق تەلەكوپىر بارىسىندا. 

بۇعان قوسا، مەملەكەت باسشىسى وڭىرلەردىڭ كىرەبەرىستەرىندە ءىلىنىپ تۇراتىن ءوز پورترەتتەرىن ەڭبەكپەن قامتۋ كورسەتكىشتەرى تۋرالى كەستەلەرمەن الماستىرۋدى تالاپ ەتكەن بولاتىن. 

سۋرەت: Tengrinews.kz