(ساتيرا)
(قازاقستان ەستراداسىنىڭ جۇلدىزى قايرات نۇرتاس لادا.kz تىلشىلەرىنە بەرگەن سۇحباتىندا ءوزىنىڭ الداعى ۋاقىتتا ساياساتقا كەتۋدى جوسپارلاپ جۇرگەنىن ايتتى.)
مىنە وسى اقپارات تاراي سالىسىمەن ايدالاداعى اۋلدى اياعىنان تىك تۇرعىزدى. اسىرەسە قوسىپ ايتپاسا كوڭىلى تولمايتىن تەنتەك كەلىنشەكتەر قاۋىمى بۇل حاباردى قولتىقتاپ ءجۇرىپ، كومەيىنەن قوسا ءجۇرىپ، ايياداي اۋىلدى التى اينالدىردى.
“قايرات نۇرتاس دەپۋتات بولادى ەكەن...”
قىزدار مەن كەلىنشەكتەر اراسىندا گۋ-گۋ وسەك، بىرەۋى بولادى، بىرەۋى بولمايدى دەيدى.
بۇگىن پالەنباي اقساقالدىڭ جۇپىنى جانۇياسىندا، تاڭعى ءشاي ۇستىندە، كەلىندەرى كوزىن تىرناپ اشىپ ۇيقىسىنان تۇرعان بەتتە قايراتتىڭ اڭگىمەسى قايتا قوزعالدى.
─ ءولااا، قايرات نۇرتاس دەپۋتات بولام دەپتى عوي، – دەپ كىشى كەلىن ەرنىن سىلپ ەتكىزدى.
─ ءۇيباي، بولسا بولسىن، انمەن ءبيدى قاتىرادى عوي! – دەپ ەكىنشى كەلىن ەمەۋرىن تانىتتى.
─ قۇرسىن، ماسقارا عوي ول، قۇداي-اۋ سول قايراتىڭ ءالاۋلايلىم مەن حالاۋلايلىمنان باسقا نە ءبىلۋشى ەدى ەي، حالىقتىڭ ءسوزىن قالاي سويلەيدى؟! ─ دەپ ۇلكەن كەلىن كوزىن الايتتى.
─ ءان ايتقان ادام سوزدە سويلەي الادى عوي! – دەپ كەنجە كەلىن قاباعىن شىتتى، – بولماسا فونوگراممامەن ايتار.
مانادان بەرى كەمپىرىنىڭ قاسىندا قاقشيىپ وتىرعان پالەنباي اقساقال سوزگە ارالاستى.
─ ءاي ، سول جۇگىرمەكتەرىڭ قاشان دەپۋتات بولادى ەكەن.
─ بىلمەيمىز، اتا ! – دەپ، كەلىندەرى جارىسا جاۋاپ بەردى.
─ ممم، – دەدى پالەنباي قارت، – بولسا، تەز بولسا ەكەن. قازىرگى وتىرىك ۋادەنى ءۇيىپ بەرىپ قۇر سوزبەن قۇيرىعى تەسىلگەنشە وتىراتىن مىنا شەندىلەردەن ابدەن جالىقتىق. وداندا مىنا بالاڭ پارلامەتتە وتىرىپ ءان سالىپ كوڭىلدى كوتەرەدى عوي؟!
تۇگەنباي كەمپىردە ءدال وسى ارادا شالىن قوستاي سويلەپ ساياسي ساۋاتتىلعىن كورسەتتى.
─ ءاي، شال، دۇرىس ايتاسىڭ، وندا دەپۋتاتتىققا زاتتىبەك پەن اقىلبەكتى دە قوسا سايلاۋ كەرەك. قازىرگىلەردىڭ ورىسشا ۇرانىن تىڭداپ شارشاعان حالىقتىڭ زاتتىبەك ۇكىمەت وتىرىسىن «اقمارجان» انىمەن، ال اناۋ اقىلبەك سەنات وتىرىسىن «قىزىل ورىك» انىمەن باستاسا اۋىلدىڭ كەمپىر شالدارى ءبىر بيلەپ، جىرعاپ قالار ەدى، – دەپ كەڭكىلدەي جونەلدى.
الگىندە عانا قايراتتى ايتىپ وتىرعان كەلىنشەكتەرىنە زىعىردانى قايناپ وتىرعان كۇيەۋلەرى قوسا كۇلدى. ءبىراق پالەنباي شال كۇلگەن جوق كەمپىرىنىڭ زاتتىبەكتى ايتقانىننا رەنجۋلى ەدى.
ءجۇمادىل جارقىنبەك
