اقتوبەلىك سوعىس ارداگەرلەرىنە جەڭىستىڭ 70 جىلدىعىنا وراي ەلباسى نۇرسۇلتان نازاربايەۆتىڭ اتىنان سىيلىقتار تابىستالدى، دەپ حابارلايدى ۆnews.kz ءتىلشىسى.
جاڭا جىل قارساڭىندا وسىنداي ماراپاتقا اقتوبە وبلىسىندا تۇراتىن 180 ۇلى وتان سوعىسىنىڭ ارداگەرى يە بولدى. پرەزيدەنتتىڭ اتىنان جولدانعان سىي-سياپاتتاردى ايماق باسشىسى مەن 12 اۋداننىڭ اكىمى ءۇيدى-ۇيدى ارالاپ وزدەرى تابىستاپ ءجۇر. مۇنداي قۇرمەتكە يە بولعانىنا 87 جاستاعى اقساقال فەدور چەمودانوۆ قۋانىشتى.
«ەلباسىمىزدىڭ ۇلى وتان سوعىسى ارداگەرلەرىن ءاردايىم نازاردان تىس قالدىرماي، قۇرمەتتەپ جۇرەتىنىنە ءدان ريزامىن. نۇرسۇلتان ءابىشۇلىنا العىسىم زور. جاڭا جىل قارساڭىندا ەلىمىز تىنىش بولسىن، قازاقستانىمىز قارىشتاپ دامي بەرسىن دەپ تىلەيمىن»،-دەيدى ۇوس ارداگەرى فەدور چەمودانوۆ. اقتوبە وبلىسىنىڭ اكىمى ارحيمەد مۇحامبەتوۆ پرەزيدەنت اتىنان جولدانعان سىيدى سونداي-اق جالعاسباي قۋاتوۆ، ۆلاديمير فينيۋتين جانە المات ەرماعامبەت اقساقالدارعا ءوزى تابىستادى. قاريالار وتكەن كۇندەرىن ەسكە الىپ، قازىرگى عۇمىرلارىنا شۇكىرشىلىك ايتىپ وتىرعاندارىن جەتكىزدى. ۇوس ارداگەرىنىڭ جەسىرى ەۆدوكيا سانجاروۆا بولسا 2014 جىلعا ەش وكپەسى جوعىن ايتادى. سەبەبى، ەلباسىنىڭ بالالىق شاعىنىڭ كۋاسى بولعان كەيۋانا بيىل نۇرسۇلتان نازاربايەۆپەن جەرگىلىكتى ەمحانادا تەكسەرىستەن ءوتىپ جۇرگەندە جۇزدەسىپ قالعان ەدى. «پرەزيدەنتتىڭ ۇيىمەن شامالعاندا كورشى تۇردىق. اتا-اناسىمەن جاقسى ارالاستىم. نۇرسۇلتاننىڭ ازامات بولعانى كوز الدىمدا. ونىمەن جۇزبە-جۇز كەزدەسسەم دەپ ارمانداپ ءجۇر ەدىم. بيىل ول ارمانىم ورىندالدى. وتكەندى ەسكە الدىق. ەندى، مىنە تاعى دا ونىڭ اتىنان سىيلىق تارتۋ ەتىپ جاتىر. ۇلكەندەرگە ىزەت كورسەتە بىلەتىن ازاماتتار كوپ بولسىن!»،-دەپ اق تىلەگىن ەۆدوكيا اجەي جاۋدىردى.
