27 جەلتوقساندا اقتاۋدا ۇوس ارداگەرلەرىن قولداۋ اكسياسىنىڭ اياسىندا پرەزيدەنت اتىنان 20 ارداگەردى قۇتتىقتادى. ماڭعىستاۋ وبلىسىنىڭ اكىمى اليك ايداربايەۆ مەملەكەت باسشىسىنىڭ اتىنان 4 ارداگەرگە سىيلىق تابىستاپ، جەكە قۇتتىقتادى دەپ حابارلايدى "قازاقپارات". اكىم ەڭ ءبىرىنشى 90 جاستاعى اننا گريگوريەۆنا موروزوۆانىڭ ۇيىنە باردى. ول سوعىسقا 1942 جىلى 14 ساۋىردە شاقىرىلعان. «ءبىز، بارلاۋشىلار اسپان مەن جەردى كۇزەتتىك. بىزگە تانك، ۇشاقتاردى وتكىزبەۋ مىندەتى جۇكتەلگەن. اسكەري نىسانداردىڭ قاۋىپسىزدىگىنە جاۋاپ بەردىك. شۇڭقىردا كوپ جاتاتىنبىز، قوزعالعان تانكىلەر مەن ۇشاقتاردىڭ دىبىسى جەر استىنان جاقسى ەستىلەتىن. 1942 جىلى ساراپوۆتى قورعاي وتىرىپ، ۆولگا ارقىلى تەمىر جول كوپىرىنىڭ قورعانىسىنا جاۋاپ بەردىك. كوپىر استى-ۇستىنە بومبالاعانىنا قاراماستان، ءبۇتىن قالدى. ونى جوعارعى كۇش ساقتاپ قالعان دەرسىڭ. كورشى زەنيتتىك باتارەيادان تەك تەرەڭ شۇڭقىر قالدى، ال ءبىزدىڭ ديۆيزيون امان قالدى...» - دەپ باياندادى ءوڭىر باسشىسىنا اۋىر كۇندەردى  ەسىنە العان ارداگەر. اننا گريگوريەۆنا ۋكراينا مەن رۋمىنيانى ازات ەتىپ، سەكەشفەحەرۆار قالاسىنا دەيىن جەتتى. سول جەردە كوپتەن كۇتكەن جەڭىستى قارسى الدى. سوڭعى 15 جىلدا ول ءىىم جۇيەسىندە قىزمەت ەتتى، كاسىپورىنداردا ءتۇرلى لاۋازىمدار اتقاردى. 1960 جىلى ماڭعىشلاققا كەلىپ، ءقازىر وسى جەردىڭ تۇرعىنى. بۇگىن اننا گريگوريەۆنا بالا-شاعاسىنىڭ ورتاسىندا عۇمىر كەشۋدە. جاۋىنگەرلىك، ەڭبەك،  مەرەيتويلىق مەدالدارىن قوسقاندا - 21 ناگراداسى بار. اكىمگە ارداگەر كوماندير اتۋعا بۇيرىق بەرمەكشى بولعاندا، امەريكالىق «بوستون» ۇشاقتارىن دىبىسى بويىنشا تانىپ قويعاندىقتان، وعان ديۆيزيون كومانديرى مالىشيەۆ ءوز ناگراداسىن شەشىپ تاققانى جايلى اڭگىمەلەپ بەردى.  وبلىس اكىمى ا. ايداربايەۆ ءبىر قۇشاق گۇل، ازىق-تۇلىكتەر مەن كوكونىستەر تولتىرىلعان سەبەت سىيعا تارتىپ، پرەزيدەنتتىڭ قۇتتىقتاۋ حاتىن وقىپ بەردى. «قۇرمەتتى ۇوس ارداگەرى!  ۇلى جەڭىستىڭ 70 جىل مەرەيتويى اتالىپ وتىلەتىن، الداعى جاڭا 2015 جىل مەرەكەسىمەن شىن جۇرەكتەن قۇتتىقتامىن! سىزدەر سوعىس جىلدارى دا، سوعىستان كەيىن دە قاجىماس، قايراتتى جىگەرلەرىڭىزبەن، ەڭبەك جولىنداعى ەرلىكتەرىڭىزبەن بەيبىتشىلىككە جەتۋ ءۇشىن، باقىتتى ۇرپاق كەلەشەگى ءۇشىن ايانباي تەر توكتىڭىزدەر. ەندى بۇگىندە كەيىنگى ۇرپاقتىڭ قۇرمەتىنە بولەنىپ، ۇلگى بولىپ جۇرسىزدەر، قازاقستاندىقتار ارداگەرلەرگە قامقورلىق تانىتىپ، قۇرمەت كورسەتىپ، ولاردى ءاردايىم ەستەرىندە ساقتايدى. سىزدەرگە، وتباسىلارىڭىزعا زور دەنساۋلىق، تاۋسىلماس جىگەر، ۇزاق تا باقىتتى عۇمىر تىلەيمىن! - دە ءسوزىن جەتكىزدى ماڭعىستاۋ وبلىسىنىڭ اكىمى. «پرەزيدەنتىمىزگە دە ۇزاق عۇمىر بەرسىن! ءبىزدىڭ دە ەلباسىعا دەگەن العىسىمىز شەكسىز»، - دەپ ويىن ءبىلدىردى ارداگەر. اكىم سودان كەيىن 91 جاستاعى قامقا ۇمبەتالىقىزىنا باردى. 1942 جىلى 19 جاسىندا سوعىسقا شاقىرىلعان ول سوعىس اياقتالعانشا قيىر شىعىستا مايداندا 9-شى اۋە اسكەرىندە قىزمەت ەتكەن.   «وتان ءۇشىن»، «ۇوس فاشيستىك گەرمانيانى جەڭگەنى ءۇشىن» وردەن، مەدالدارىمەن قوسا،  ول يوسيف ءستاليننىڭ قولىنان العىس حات العان. قامقا ۇمبەتالى قىزى 1945 جىلى جاپونيا اسكەرىنە قارسى جاۋىنگەرلىك اۋە ۇشىرىلىمىنا قاتىسقان. وندا «جاپونياداعى جەڭىسى ءۇشىن» وردەنىمەن ماراپاتتالعان. بارلىعى قورجىنىندا 16 وردەن، مەدال بار. سوعىستان كەيىن مۇناي سالاسىندا قىزمەت ەتكەن. ءۇشىنشى ارداگەر بيسەن بوقايەۆ. قاريا 19 جەلتوقساندا 91 جاسقا تولىپتى. 1942 جىلى اسكەرگە شاقىرىلىپ، جەڭىستى كەڭەستىك-رۋمىندىق شەكارادا قارسى العان. ول مولداۆيا، رۋمىنيا، ۆەنگريانى ازات ەتۋگە قاتىسقان. ءتورتىنشى بولىپ وبلىس اكىمى ءتورت جىل بويى سوعىستا ايقاسقان 92 جاستاعى بالاباي ازانوۆتى قۇتتىقتادى. سوعىسقا دەيىن ارداگەر ۋكراينادا تۇرعان، تۇركىمەنستان تۋماسى. سول جەردەن 1941 جىلى اسكەرگە شاقىرىلادى.  ستالينگرادتى ازات ەتۋگە قاتىسقان. «سوعىس جىلدارى 2 رەت جارالانعام. ءقازىر 2 توپ مۇگەدەگىمىن، قۇلاعىم ناشار ەستيدى. سوندا دا وقىعاندى جاقسى كورەمىن»، - دەدى ول قوناقتارعا بۋما-بۋما گازەتتەرىن كورسەتىپ. 30 جەلتوقسانعا دەيىن پرەزيدەنتتىڭ تاپسىرماسى بويىنشا وبلىس، قالا، اۋدان اكىمدەرى بارلىق سوعىس ارداگەرلەرىن ارالاپ شىعادى. بۇگىندە ولاردىڭ سانى - 66. ولارعا پرەزيدەنت اتىنان سىيلىقتار تابىستالىپ، ەلباسىنىڭ ارنايى قۇتتىقتاۋى جەتكىزىلەدى.