قازاقستاندا ۇلى وتان سوعىسىنا قاتىسقان جالعىز كەڭەس وداعىنىڭ باتىرى قالدى دەپ حابارلايدى "قازاقپارات".
بۇگىندە ۇلى وتان سوعىسىنا قاتىسقان كوزى ءتىرى جالعىز كەڭەس وداعىنىڭ باتىرى الماتى وبلىسىندا تۇرادى. بۇل تۋرالى بۇگىن ورتالىق كوممۋنيكاسيالار قىزمەتىندە وتكەن بريفينگتە «ق ر ارداگەرلەر ۇيىمى» قوعامدىق بىرلەستىگى ورتالىق كەڭەسىنىڭ ءتوراعا ورىنباسارى بەكبولات مۇقىشيەۆ ايتتى.
«وكىنىشكە قاراي، بۇگىندە قازاقستاندا ۇلى وتان سوعىسىنا قاتىسقان جالعىز كەڭەس وداعىنىڭ باتىرى قالدى. ول - يۆان كوسەنكوۆ. ول كىسى ءقازىر الماتى وبلىسىندا تۇرادى»، - دەدى ول.
يۆان كوسەنكوۆ كەڭەس وداعىنىڭ باتىرى اتاعىن ۋكراينا جەرىندەگى دنەپر وزەنى بويىنداعى شايقاستاردا كورسەتكەن ەرلىگى ءۇشىن العان. ول 333-اتقىشتار ديۆيزياسىنىڭ 1118-اتقىشتار پولكى قۇرامىندا ماسكەۋدەن بولگارياعا دەيىن باردى.
ب. مۇقىشيەۆتىڭ ايتۋىنشا، 2015 جىلى ارداگەرلەردى ۋكرايناداعى ۇرىس بولعان جەرلەرگە اپارۋ جوسپارلانعان.
«ۇلى وتان سوعىسىنا قاتىسقان اكەلەرىمىز بەن اتالارىمىزدىڭ مۇردەلەرى جاتقان جەرلەرگە ارداگەرلەردى اپارۋ مىندەتتى تۇردە قاراستىرىلعان. وعان كەتەتىن شىعىن ءتىپتى رەسپۋبليكالىق بيۋدجەتتە دە جوسپارلانعان. ەل ۇكىمەتى جەڭىستىڭ 70 جىلدىعىنا ارناپ قابىلداعان شارالار جوسپارىندا وسى ماسەلە دە جان-جاقتى قاراستىرىلىپ وتىر»، - دەدى ول.
بۇعان دەيىن حابارلاعانىمىزداي، بۇگىندە ەلىمىزدە 5 115 ۇلى وتان سوعىسىنىڭ ارداگەرى قالدى.
