ءقازىر القالى توپتىڭ ورنىن الەۋمەتتىك جەلى الماستىردى. بۇرىنعى كۇلتوبەنىڭ باسىندا كۇندە جيىننىڭ جيناقى نۇسقاسى وسى - Facebook. كەشەگى بيلەرشە كەسىم ايتار كوسەم دە، شىمىر ويلى شەشەن دە وسىندا. Facebookء-تىڭ وزگە ءوزى تۇرعىلاس الەۋمەتتىك جەلىلەردەن ارتىقشىلىعى مۇندا سالماقتى ويلار ايتىپ، سالماقتى ادامدار وتىرادى.  تانىمال تۇلعاڭىزبەن حات جازىسىپ، ەمىن-ەركىن پىكىر الماسا الاسىز. جازۋشى دا، جازارمان دا، شابارمان دا، ءانشى دە، ءبيشى دە ءبارى وسىندا. ولاردىڭ جەكە ومىرلەرىندەگى جاڭالىقتارى مەن شىعارماشىلىق جەتىستىكتەرى جازبالاردا جاريالانىپ تىلەۋلەستىگىمىزدى «لايكپەن» ءبىلدىرىپ جاتامىز.

ءقازىر وسى Facebook قولدانۋشىلارىنىڭ ءارقايسىسى شتاتتان تىس حابارشى قىزمەتىندە. جاڭالىق تاراتۋدان اقپاراتتىق اگەنتتىكتەردىڭ الدىن وراپ كەتەمىز. جاڭا كىتاپتىڭ تۇساۋكەسەرى بولسىن، مەرەيتوي بولسىن، جەكە ءان كەشتەردىڭ جارناماسىن جاساپ، قوناققا شاقىرىپ، دوستارىمەن ءبولىسىپ جاتقانىمىز... قۇبا-قۇپ. ءبىر عالىمنىڭ مەرەيتويىن، بەلگىلى تۇلعالاردىڭ كەزەكتى ماراپات يەسى اتانعانىن بۇرىنىراق ايتىپ، بىر-بىرىمىزدەن لايك تىلەپ وتىرعانىمىز... دۇرىس تا شىعار. جازعان جازبامىزدىڭ جاعدايىن، جاعالاي قويىلعان «لايكپەن» ولشەيتىن بولدىق. ەندى مىنا قىزىقتى قاراڭىز. ءومىر بار جەردە ءولىم بار. ءقازىر قازانامانى دا وسى جەلىدە جازبا ارقىلى تاراتاتىن بولدىق. ءبىر جاعىنان ءتيىمدى تۇستارى دا جوق ەمەس. بارلىعىنا قوڭىراۋ شالىپ ەستىرتىپ جاتقاننان، جازباعا جاريالاساڭىز ءوزىن «جاقىنىمىن» دەپ تاپقان ءار كىسى كوڭىل ايتىپ، ساداقاسىنا جيىلادى.

ءبىر تۇسىنبەيتىنىم، قازانامانى جەتكىزىپ، كوڭىل ايتار لەبىز بىلدىرگەنىمىزدە شەكتەن تىس «لايكتىڭ» استىندا قالاتىنىمىز. سوندا قالاي، قۋانىشتا قولدانىلار سەزىم مەن قايعىدا قايتار كوڭىلدىڭ ارا جىگىن اجىراتا الماي قالعانىمىز با؟ قايعىدان قان جۇتپاساق تا ولىمىنە «ۇنايدى» تۇيمەسىن باساتىنىمىز قالاي؟ قازاق تۋىسى تۇگىل قايمانا بىرەۋدىڭ قازاسىنا كوڭىل ايتىپ، كوز جاسىن ءبىر سىعىپ الماۋشى ما ەدى؟ الدە قاي تۇلعانىڭ تىرلىگىندە ءقادىرلى بولعانىن قازانامانىڭ استىنا قويىلعان «لايكپەن» ولشەيمىز بە؟ قازا تۇرعىسىندا حابارى ازداۋ بىرەۋدىڭ تىرلىگى شىعار دەسەڭ، العاشقى «لايكتى» كەيدە اقىل ايتار اعالاردىڭ ءوزى باساتىنى توسىرقاتىپ تاستايدى. قويشى،نە كەرەك قازاعا قۋاناتىن قازاقتى دا Facebook-تەن كوردىك.

ورىنباسار باقىتبەك